തിരുവനന്തപുരം: രാജ്യത്ത് വോട്ട് ചോർച്ചയുമായി ബന്ധപ്പെട്ട പ്രതിഷേധം ശക്തമാകുന്നതിനിടെ കേരളത്തിലെ വോട്ടർപട്ടികയുടെ എസ്‌ഐആർ കണക്കുകളിലും അവ്യക്തത. എസ്‌ഐആർ അന്തിമപട്ടികയിൽ തിരിച്ചെത്തിയ 15 ലക്ഷത്തിലേറെ വോട്ടർമാരിൽ കന്നി വോട്ടർമാർ എത്രയെന്ന കണക്ക് തെരഞ്ഞെടുപ്പ് കമ്മീഷൻ പുറത്തുവിട്ടിട്ടില്ല. പുതിയ സോഫ്റ്റ്‌വെയർ സംവിധാനത്തിൽ കന്നി വോട്ടർമാരെ പ്രത്യേകം തിരിച്ചറിയാൻ കഴിയില്ലെന്നാണ് കമ്മീഷന്റെ വിശദീകരണം.
എസ്‌ഐആറിന് മുമ്പ് കേരളത്തിൽ 2,78,50,855 വോട്ടർമാരുണ്ടായിരുന്നു. എന്നാൽ എസ്‌ഐആർ കരട് പട്ടിക പ്രസിദ്ധീകരിച്ചപ്പോൾ വോട്ടർമാരുടെ എണ്ണം 2,54,42,352 ആയി കുറഞ്ഞു. അതായത് 24,08,503 വോട്ടർമാർ കരട് പട്ടികയിൽ നിന്ന് പുറത്തായി.
പിന്നീട് എസ്‌ഐആർ അന്തിമപട്ടിക പ്രസിദ്ധീകരിച്ചപ്പോൾ വോട്ടർമാരുടെ എണ്ണം 2,69,53,644 ആയി ഉയർന്നു. 15,11,292 വോട്ടർമാർ പട്ടികയിൽ തിരിച്ചെത്തിയെന്നാണ് തെരഞ്ഞെടുപ്പ് കമ്മീഷന്റെ കണക്ക്. എന്നാൽ തിരിച്ചെത്തിയവരിൽ മുമ്പ് പുറത്തായവർ എത്രപേരാണെന്നും പുതിയതായി ഉൾപ്പെട്ട കന്നി വോട്ടർമാർ എത്രയാണെന്നും വ്യക്തമല്ല.
നിയമസഭാ തെരഞ്ഞെടുപ്പുമായി ബന്ധപ്പെട്ട കണക്കുകളിലും സമാനമായ അവ്യക്തത നിലനിൽക്കുന്നുണ്ട്. നിയമസഭാ തെരഞ്ഞെടുപ്പിൽ 8.97 ലക്ഷം വോട്ടർമാരാണ് പട്ടികയിൽ നിന്ന് പുറത്തായതെന്നാണ് കമ്മീഷന്റെ വിശദീകരണം. തെരഞ്ഞെടുപ്പിന് ശേഷം 3.92 ലക്ഷം പേർ പട്ടികയിലേക്ക് തിരിച്ചെത്തിയതായും കമ്മീഷൻ വ്യക്തമാക്കുന്നു.
നിലവിലെ കണക്കനുസരിച്ച് ഒക്ടോബർ 5 വരെ കേരളത്തിലെ വോട്ടർമാരുടെ എണ്ണം 2,73,46,351 ആണ്. എസ്‌ഐആർ കരട് പട്ടികയിൽ നിന്ന് പുറത്തായ 24 ലക്ഷത്തിലേറെ പേരിൽ എത്ര പേർ പിന്നീട് തിരിച്ചെത്തിയെന്ന കണക്ക് കൃത്യമായി പുറത്തുവിടാത്തതാണ് ഇപ്പോൾ പ്രധാനമായും ഉയരുന്ന ചോദ്യം.
പുതിയ സോഫ്റ്റ്‌വെയർ സംവിധാനത്തിൽ കന്നി വോട്ടർമാരെ പ്രത്യേകം കണ്ടെത്താൻ കഴിയില്ലെന്ന തെരഞ്ഞെടുപ്പ് കമ്മീഷന്റെ വിശദീകരണത്തിന്റെ നിയമസാധുതയിലും ചോദ്യങ്ങൾ ഉയരുന്നുണ്ട്. വോട്ടർമാരെ കണ്ടെത്തുന്നതിലെ ബുദ്ധിമുട്ടുകൾ സംബന്ധിച്ച് ബൂത്ത് ലെവൽ ഓഫീസർമാർ (ബിഎൽഒമാർ) നേരത്തെ തന്നെ പരാതികൾ ഉന്നയിച്ചിരുന്നു. പല വീടുകളും ഫ്ലാറ്റുകളും അടഞ്ഞുകിടക്കുന്ന സാഹചര്യവും ചൂണ്ടിക്കാട്ടപ്പെട്ടിരുന്നു.
അതേസമയം, കന്നി വോട്ടർമാരെ പട്ടികയിൽ ഉൾപ്പെടുത്തുന്നതിനായി ക്യാമ്പസുകൾ കേന്ദ്രീകരിച്ചും മറ്റും വിപുലമായ ബോധവൽക്കരണ പ്രവർത്തനങ്ങൾ നടത്തിയിരുന്നു. ഇതോടെ പുതിയ വോട്ടർമാരുടെ എണ്ണം ഗണ്യമായി വർധിച്ചിട്ടുണ്ടാകാമെന്ന വിലയിരുത്തലുമുണ്ട്. എന്നാൽ ഈ വിഭാഗത്തിൽപ്പെട്ട വോട്ടർമാരുടെ കൃത്യമായ എണ്ണം പുറത്തുവിടാത്തതാണ് വിമർശനങ്ങൾക്ക് ഇടയാക്കുന്നത്.
അതിനിടെ എസ്‌ഐആർ വിവാദത്തിൽ പ്രതിഷേധം ശക്തമായ സാഹചര്യത്തിൽ നടപടികളുമായി തെരഞ്ഞെടുപ്പ് കമ്മീഷൻ. എസ്‌ഐആറിനിടെ പട്ടികയിൽ നിന്ന് പുറത്തായ അർഹരായ വോട്ടർമാരെ വീണ്ടും ഉൾപ്പെടുത്തുന്നതിനായി പ്രത്യേക ഡ്രൈവ് നടത്തുമെന്ന് കമ്മീഷൻ അറിയിച്ചു.
ഒക്ടോബർ 15 മുതൽ 31 വരെ വോട്ടർപട്ടികയിൽ പേര് ചേർക്കാൻ അവസരം നൽകും. എസ്‌ഐആറുമായി ബന്ധപ്പെട്ട് ലഭിച്ച മുഴുവൻ പരാതികളും തീർപ്പാക്കിയതായും തെരഞ്ഞെടുപ്പ് കമ്മീഷൻ അറിയിച്ചു.
അർഹരായ എല്ലാവരെയും വോട്ടർപട്ടികയിൽ ഉൾപ്പെടുത്തുമെന്ന് മുഖ്യ തെരഞ്ഞെടുപ്പ് ഓഫീസർ ഡി. സജിത്ത് ബാബു വ്യക്തമാക്കി. കേന്ദ്ര തെരഞ്ഞെടുപ്പ് കമ്മീഷന്റെ നിർദ്ദേശപ്രകാരമാണ് പ്രത്യേക ഡ്രൈവ് നടത്തുന്നതെന്നും അദ്ദേഹം പറഞ്ഞു.
നിയമസഭാ തെരഞ്ഞെടുപ്പുമായി ബന്ധപ്പെട്ട് പരാതികളൊന്നും ലഭിച്ചിട്ടില്ലെന്നും സജിത്ത് ബാബു അറിയിച്ചു. കന്നി വോട്ടർമാരെ ഉൾപ്പെടെ ലക്ഷ്യമിട്ട് കലാലയങ്ങൾ കേന്ദ്രീകരിച്ചും വോട്ടർ രജിസ്ട്രേഷൻ പ്രചാരണം ശക്തമാക്കുമെന്നും തെരഞ്ഞെടുപ്പ് ഓഫീസർ വ്യക്തമാക്കി.
