കോഴിക്കോട്: കുന്ദമംഗലത്ത് ഹോട്ടലിൽ അതിക്രമിച്ച് കയറി കല്ലുപയോഗിച്ച് അക്രമം നടത്തുകയും യുവതിയെ കൊല്ലാൻ ശ്രമിക്കുകയും ചെയ്ത കേസിൽ യുവാവിനെ പൊലീസ് അറസ്റ്റ് ചെയ്തു. കുന്ദമംഗലം സ്വദേശി ഉണ്ണികൃഷ്ണൻ (39) ആണ് അറസ്റ്റിലായത്.

കഴിഞ്ഞ ദിവസം രാവിലെയാണ് സംഭവം നടന്നത്. കുന്ദമംഗലം പാലക്കലിലെ റസ്റ്റോറന്റിൽ ബില്ലിംഗ് സ്റ്റാഫായി ജോലി ചെയ്യുന്ന തൃശ്ശൂർ സ്വദേശിനിയായ യുവതി ജോലി ചെയ്യുന്നതിനിടെയാണ് ഉണ്ണികൃഷ്ണൻ ഹോട്ടലിൽ അതിക്രമിച്ച് കയറിയത്.

തുടർന്ന് ബാഗിൽ സൂക്ഷിച്ചിരുന്ന കല്ലെടുത്ത് റസ്റ്റോറന്റിന്റെ മുൻവശത്തെ ചില്ല് തകർക്കുകയും അവിടെയുള്ള സാധനങ്ങൾ നശിപ്പിക്കുകയും ചെയ്തു. പൊട്ടിയ ചില്ലിന്റെ കഷണം യുവതിയുടെ കഴുത്തിന് നേരെ വീശി ആക്രമിക്കാനും ശ്രമിച്ചെന്നാണ് പരാതി.

യുവതിയുടെ പരാതിയിൽ കുന്ദമംഗലം പൊലീസ് കേസെടുത്ത് അന്വേഷണം നടത്തി. തുടർന്ന് സി.ഐ അഭിലാഷിന്റെ നേതൃത്വത്തിലുള്ള പൊലീസ് സംഘം ഉണ്ണികൃഷ്ണനെ കുന്ദമംഗലത്തുനിന്ന് കസ്റ്റഡിയിലെടുത്തു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.