തിരുവനന്തപുരം: മന്ത്രി കെ. എം. ഷാജിയുടെ വിവാദ പ്രാഗ് യാത്രയിൽ അന്വേഷണം ആരംഭിച്ച് കേന്ദ്രസർക്കാർ. യാത്രയുമായി ബന്ധപ്പെട്ട പ്രാഥമിക വിവരങ്ങൾ കേന്ദ്ര രഹസ്യാന്വേഷണ വിഭാഗം ശേഖരിച്ചു. യാത്രയുടെ ഉദ്ദേശ്യവും ക്രിമിനൽ കേസുകളിലെ പ്രതികളുടെ സാന്നിധ്യവും ഉൾപ്പെടെയുള്ള കാര്യങ്ങൾ പരിശോധിക്കാനാണ് നീക്കം.

സർക്കാർ അനുമതിയില്ലാതെയാണ് കെ. എം. ഷാജി ചെക്ക് റിപ്പബ്ലിക്കിലെ പ്രാഗ് സന്ദർശിച്ചതെന്നാണ് ആരോപണം. സെപ്റ്റംബർ 16 മുതൽ 26 വരെ യൂറോപ്യൻ രാജ്യങ്ങളിലേക്ക് യാത്ര നടത്താനാണ് മന്ത്രിക്ക് അനുമതി ലഭിച്ചിരുന്നത്. ഓസ്ട്രിയ, ബൾഗേറിയ, സ്വിറ്റ്സർലൻഡ്, യു.എ.ഇ. എന്നീ രാജ്യങ്ങളിലേക്കായിരുന്നു അനുമതി. എന്നാൽ, കേന്ദ്ര-സംസ്ഥാന സർക്കാരുകളുടെ അനുമതിയില്ലാതെ പ്രാഗിലും സന്ദർശനം നടത്തിയെന്നാണ് പുറത്തുവരുന്ന വിവരം.

പ്രാഗിൽ ഒന്നിലധികം ദിവസം ചെലവഴിച്ചെന്ന സൂചനകളും പുറത്തുവന്നിട്ടുണ്ട്. സാമൂഹികമാധ്യമങ്ങളിൽ മന്ത്രി പങ്കുവെച്ച ചിത്രങ്ങൾ വ്യത്യസ്ത ദിവസങ്ങളിൽ എടുത്തതാണെന്നാണ് വിലയിരുത്തൽ. യാത്രയുടെ യഥാർഥ ഉദ്ദേശ്യം ഉൾപ്പെടെയുള്ള കാര്യങ്ങൾ രഹസ്യാന്വേഷണ വിഭാഗം പരിശോധിക്കും.

കെ. എം. ഷാജിയുടെ ചെക്ക് റിപ്പബ്ലിക് യാത്രയുമായി ബന്ധപ്പെട്ട് പുറത്തുവരുന്ന വിവരങ്ങൾ ഗൗരവമുള്ളതാണെന്ന് മുൻ മന്ത്രി പി. രാജീവ് ആരോപിച്ചു. അനുമതി വാങ്ങിയും വാങ്ങാതെയും മറ്റ് മന്ത്രിമാർ വിദേശയാത്ര നടത്തിയിട്ടുണ്ടോയെന്ന കാര്യങ്ങളും പുറത്തുവരാനുണ്ടെന്ന് അദ്ദേഹം പറഞ്ഞു. താൻ സഞ്ചരിക്കുന്നതാണ് മന്ത്രിയുടെ വാഹനമെന്ന നിലപാടാണ് കെ. എം. ഷാജിയുടേതെന്നും താൻ പോകുന്നിടത്തെല്ലാം അനുമതി ലഭിക്കുമെന്ന് മന്ത്രി കരുതിയിരിക്കാമെന്നും പി. രാജീവ് പരിഹസിച്ചു.

വിദേശയാത്രകൾക്ക് രാഷ്ട്രീയ അനുമതി നിർബന്ധമാണെന്നും അതില്ലാതെയാണ് യാത്ര നടത്തിയതെന്ന ആരോപണം ഗൗരവത്തോടെ കാണണമെന്നും പി. രാജീവ് പറഞ്ഞു. സ്വകാര്യ സന്ദർശനമാണെങ്കിൽ പൊതുപരിപാടികളിൽ പങ്കെടുക്കാൻ പാടില്ലെന്നും അദ്ദേഹം കൂട്ടിച്ചേർത്തു.

കെ. എം. ഷാജിയുടെ യാത്രയിൽ ദുരൂഹതയുണ്ടെന്ന് ഡി.വൈ.എഫ്.ഐയും ആരോപിച്ചു. യാത്രയുടെ ഉദ്ദേശ്യം മന്ത്രി വ്യക്തമാക്കണമെന്നും വിഷയത്തിൽ മുസ്‌ലിം ലീഗ് മറുപടി പറയണമെന്നും ഡി.വൈ.എഫ്.ഐ. സംസ്ഥാന സെക്രട്ടറി എം. വിജിൻ ആവശ്യപ്പെട്ടു.