റിയാദ്: ഹൂതി ആക്രമണങ്ങളുടെ പശ്ചാത്തലത്തിൽ എയർ ഇന്ത്യ, എയർ ഇന്ത്യ എക്സ്പ്രസ് വിമാന സർവീസുകൾ ഒക്ടോബർ 24 വരെ റദ്ദാക്കി. സൗദി അറേബ്യയിലെ റിയാദ്, ജിദ്ദ, ദമ്മാം എന്നിവിടങ്ങളിലേക്കും തിരിച്ചുമുള്ള സർവീസുകളാണ് റദ്ദാക്കിയത്. ഈ മാസം 20 മുതൽ സർവീസുകൾ പുനഃസ്ഥാപിക്കുമെന്നായിരുന്നു നേരത്തെയുള്ള അറിയിപ്പ്. ഇൻഡിഗോ, ആകാശ എയർ എന്നീ വിമാനക്കമ്പനികളും ഒക്ടോബർ 24 വരെ സർവീസുകൾ റദ്ദാക്കിയിട്ടുണ്ട്.
അതേസമയം, സൗദി അറേബ്യയെ ലക്ഷ്യമിട്ട് ഹൂതികളുടെ ആക്രമണശ്രമങ്ങൾ തുടരുകയാണ്. ജിസാൻ, ഖമീസ് മുശൈത്ത്, അബഹ നഗരങ്ങൾ ലക്ഷ്യമിട്ട് ഡ്രോൺ, മിസൈൽ ആക്രമണശ്രമങ്ങൾ ഉണ്ടായതായി റിപ്പോർട്ടുണ്ട്. ആക്രമണശ്രമങ്ങളെല്ലാം പ്രതിരോധിച്ചതായി സൗദി സഖ്യസേന അറിയിച്ചു.
