തിരുവനന്തപുരം: കായികമേളയ്ക്കിടെ ഭക്ഷണത്തിൽ പുഴുവിനെ കണ്ടെത്തിയെന്ന വിവാദത്തിൽ വിദ്യാഭ്യാസ മന്ത്രിയുടെ വാദങ്ങൾ തള്ളി സസ്‌പെൻഷനിലായ അധ്യാപകൻ ജിജോ ജെയിംസിന്റെ ഭാര്യ നന്ദിനി. ഭക്ഷണത്തിൽനിന്ന് ലഭിച്ചത് ചത്ത പുഴുവായിരുന്നുവെന്നും സംഭവം പുറത്തുവന്നതിനു പിന്നാലെ ജിജോയ്‌ക്കെതിരെ വ്യാപകമായ നുണപ്രചാരണമാണ് നടക്കുന്നതെന്നും നന്ദിനി ആരോപിച്ചു. പുഴുവിനെ കണ്ട ഉടൻ ജിജോ ദൃശ്യങ്ങൾ പകർത്തി തനിക്ക് അയച്ചുനൽകിയിരുന്നുവെന്നും അവർ പറഞ്ഞു.

ഭക്ഷണത്തിൽ ചത്ത പുഴുവിനെയാണ് കണ്ടെത്തിയത്. ഇതിന്റെ ദൃശ്യങ്ങൾ ജിജോ ഉടൻതന്നെ അയച്ചുതന്നിരുന്നു. എന്നാൽ സംഭവത്തിൽ സത്യാവസ്ഥ പരിശോധിക്കാതെ പൊലീസ് ജിജോയെ കസ്റ്റഡിയിലെടുക്കുകയായിരുന്നു. എന്താണ് യഥാർഥത്തിൽ സംഭവിച്ചതെന്ന് ആരും അന്വേഷിച്ചില്ലെന്നും സമൂഹമാധ്യമങ്ങളിലൂടെ ജിജോയെ അപമാനിക്കുകയാണെന്നും നന്ദിനി ആരോപിച്ചു.

പുഴുവിനെ കണ്ടപ്പോൾ പ്രതികരിക്കേണ്ട സാഹചര്യമുണ്ടായതല്ലാതെ രാഷ്ട്രീയ ലക്ഷ്യങ്ങളൊന്നും ജിജോയ്ക്കുണ്ടായിരുന്നില്ലെന്നും നന്ദിനി വ്യക്തമാക്കി. നിലവിൽ ജിജോ ഒരു രാഷ്ട്രീയ പാർട്ടിയിലും പ്രവർത്തിക്കുന്നില്ല. എന്നാൽ സംഭവത്തെ രാഷ്ട്രീയവൽക്കരിക്കാനുള്ള ശ്രമങ്ങളാണ് നടക്കുന്നതെന്നും അവർ ആരോപിച്ചു.

അതേസമയം, ജിജോ ജെയിംസിന്റെ രാഷ്ട്രീയ ബന്ധങ്ങളെക്കുറിച്ച് നേരത്തെ കോൺഗ്രസ് നേതാവും രംഗത്തെത്തിയിരുന്നു. 2020ലെ തദ്ദേശ സ്വയംഭരണ തെരഞ്ഞെടുപ്പിന് ശേഷം ജിജോ കോൺഗ്രസിൽനിന്ന് അകന്നുവെന്നും പിന്നീട് ഡിവൈഎഫ്ഐ അംഗത്വം സ്വീകരിച്ചുവെന്നുമാണ് വേങ്ങൂർ മണ്ഡലം പ്രസിഡന്റ് റിജു കുര്യൻ ആരോപിച്ചത്.

കഴിഞ്ഞ ദിവസമാണ് കായികമേളയ്ക്കിടെ വിളമ്പിയ സാമ്പാറിൽ പുഴുവിനെ കണ്ടെത്തിയെന്ന ആരോപണം ഉയർന്നത്. സംഭവം വലിയ വിവാദമായതോടെ തനിക്ക് പരാതിയില്ലെന്ന് അധ്യാപകൻ ജിജോ ജെയിംസ് എഴുതി നൽകിയിരുന്നു. എന്നാൽ പിന്നീട് പൊലീസ് അദ്ദേഹത്തെ കസ്റ്റഡിയിലെടുക്കുകയും അറസ്റ്റ് രേഖപ്പെടുത്തുകയും ചെയ്തു.

അധ്യാപകന്റെ ആരോപണങ്ങളെ പൂർണമായും തള്ളിയ നിലപാടായിരുന്നു വിദ്യാഭ്യാസ മന്ത്രി എൻ. ഷംസുദ്ദീൻ സ്വീകരിച്ചത്. രാഷ്ട്രീയ വിരോധത്തിന്റെ പേരിലാണ് ചിലർ പ്രവർത്തിക്കുന്നതെന്നും അധ്യാപകന്റേത് നാടകമാണെന്നുമായിരുന്നു മന്ത്രിയുടെ പ്രതികരണം.