വിജയ് സേതുപതിയെ നായകനാക്കി മിഷ്കിൻ സംവിധാനം ചെയ്യുന്ന ഏറെ പ്രതീക്ഷയോടെ കാത്തിരിക്കുന്ന തമിഴ് ആക്ഷൻ ത്രില്ലർ ചിത്രം ‘ട്രെയിൻ’ 2026 ഡിസംബർ 4ന് ലോകമെമ്പാടുമുള്ള തിയേറ്ററുകളിൽ റിലീസ് ചെയ്യും. വിജയ് സേതുപതി – മിഷ്കിൻ കൂട്ടുകെട്ടിലുള്ള ചിത്രത്തിനായി ആരാധകരും സിനിമാപ്രേമികളും ഏറെ പ്രതീക്ഷയോടെയാണ് കാത്തിരിക്കുന്നത്.
അന്താരാഷ്ട്ര നിയോ-നോയർ സിനിമകളുടെ ആഖ്യാനശൈലിയും തീവ്രമായ മനുഷ്യവികാരങ്ങളും സമന്വയിപ്പിക്കുന്നതാണ് മിഷ്കിന്റെ സംവിധാനശൈലി. ‘ചിത്തിരം പേസുതടി’ എന്ന ചിത്രത്തിലൂടെ സംവിധാനരംഗത്തെത്തിയ മിഷ്കിന്റെ ശ്രദ്ധേയമായ ഹിറ്റുകളാണ് ‘പിസാസു’, ‘തുപ്പറിവാളൻ’, ‘സൈക്കോ’ തുടങ്ങിയ ചിത്രങ്ങൾ. സംവിധായകനെന്ന നിലയിൽ മാത്രമല്ല, മികച്ച നടൻ എന്ന നിലയിലും അദ്ദേഹം ശ്രദ്ധേയനാണ്. ‘സൂപ്പർ ഡീലക്സ്’, ‘മാവീരൻ’, ‘ലിയോ’ തുടങ്ങിയ ചിത്രങ്ങളിലെ പ്രധാന വേഷങ്ങളിലൂടെ അഭിനയരംഗത്തും മിഷ്കിൻ തന്റെ സാന്നിധ്യം തെളിയിച്ചിട്ടുണ്ട്.
കലൈപ്പുലി എസ്. താണു, വി ക്രിയേഷൻസിന്റെ ബാനറിലാണ് ‘ട്രെയിൻ’ നിർമ്മിക്കുന്നത്. ‘കണ്ടുകൊണ്ടേൻ കണ്ടുകൊണ്ടേൻ’, ‘കാക്ക കാക്ക’, ‘തുപ്പാക്കി’, ‘കബാലി’ തുടങ്ങി വിവിധ കാലഘട്ടങ്ങളിലും വ്യത്യസ്ത വിഭാഗങ്ങളിലുമായി നിരവധി ബ്ലോക്ക്ബസ്റ്റർ ചിത്രങ്ങൾ നിർമ്മിച്ചിട്ടുള്ള പ്രമുഖ നിർമ്മാതാവാണ് കലൈപ്പുലി എസ്. താണു. ധനുഷ്, വെട്രിമാരൻ തുടങ്ങിയ പ്രമുഖ താരങ്ങളുമായും സംവിധായകരുമായും അദ്ദേഹം സഹകരിച്ചിട്ടുണ്ട്. വെട്രിമാരൻ സംവിധാനം ചെയ്യുന്ന ‘അരസൻ’ ആണ് അദ്ദേഹത്തിന്റെ പ്രധാനപ്പെട്ട വരാനിരിക്കുന്ന ചിത്രങ്ങളിലൊന്ന്.
മിഷ്കിന്റെ പതിവ് സിനിമാശൈലിയുടെ പ്രത്യേകതകൾ ഉൾക്കൊള്ളുന്ന തീവ്രമായ ഒരു ത്രില്ലറായിരിക്കും ‘ട്രെയിൻ’ എന്നാണ് പ്രതീക്ഷിക്കുന്നത്. ചിത്രത്തിന് സെൻസർ ബോർഡിന്റെ U/A സർട്ടിഫിക്കറ്റ് ലഭിച്ചിട്ടുണ്ട്.
വിജയ് സേതുപതിക്കൊപ്പം ശ്രുതി ഹാസൻ, നാസർ, യുകി സേതു, നരേൻ, കെ. എസ്. രവികുമാർ, സമ്പത്ത് രാജ്, കലൈയരശൻ, ഇറ ദയാനന്ദ്, അജയ് രത്നം, വിൻസെന്റ് അശോകൻ തുടങ്ങിയ പ്രമുഖ താരങ്ങളും ചിത്രത്തിൽ അണിനിരക്കുന്നു.
മിഷ്കിൻ തന്നെയാണ് ചിത്രത്തിന്റെ സംഗീതസംവിധാനം നിർവഹിച്ചിരിക്കുന്നത്. ഫൗസിയ ഫാത്തിമയാണ് ഛായാഗ്രഹണം. വിജയ് സേതുപതിയുടെ പ്രകടനവും മിഷ്കിന്റെ വ്യത്യസ്തമായ ആഖ്യാനശൈലിയും ഒത്തുചേരുന്ന ‘ട്രെയിൻ’ ഈ വർഷത്തെ ഏറെ പ്രതീക്ഷയുള്ള തമിഴ് ചിത്രങ്ങളിലൊന്നാണ്.
ചിത്രത്തിന്റെ കേരളത്തിലെ വിതരണാവകാശം ഐഎംപി ഫിലിംസ് സ്വന്തമാക്കി. നേരത്തെ വിജയ് ചിത്രം ‘ജനനായകൻ’, സൂര്യ ചിത്രം ‘കറുപ്പ്’ എന്നിവ കേരളത്തിലെ പ്രേക്ഷകരിലേക്ക് എത്തിച്ചതും ഐഎംപി ഫിലിംസാണ്. ആസിഫ് അലി നായകനാകുന്ന ‘കോട്ടയം ബെൽറ്റ്’ ആണ് വരാനിരിക്കുന്ന ഐഎംപിയുടെ മലയാള ചിത്രം.
ആകർഷകമായ പ്രമേയം, ശ്രദ്ധേയമായ താരനിര, മിഷ്കിന്റെ വ്യത്യസ്തമായ ചലച്ചിത്രാവിഷ്കാരം എന്നിവയുമായി ‘ട്രെയിൻ’ 2026 ഡിസംബർ 4ന് ലോകമെമ്പാടുമുള്ള തിയേറ്ററുകളിലെത്തും.
