ന്യൂഡൽഹി: സമരസ്ഥലങ്ങൾ അനിശ്ചിതകാലത്തേക്ക് കൈവശം വെക്കാനാകില്ലെന്നും പ്രതിഷേധങ്ങൾക്ക് കൃത്യമായ സമയപരിധി നിശ്ചയിക്കണമെന്നും സുപ്രീംകോടതി ചീഫ് ജസ്റ്റിസ് സൂര്യകാന്ത്. അനുമതി ലഭിച്ച സ്ഥലങ്ങളിൽ നിശ്ചിത സമയത്തേക്ക് മാത്രമായിരിക്കണം പ്രതിഷേധങ്ങൾ നടത്തേണ്ടതെന്നും കോടതി നിരീക്ഷിച്ചു. മറ്റ് സംഘടനകൾക്കും വിഭാഗങ്ങൾക്കും പ്രതിഷേധിക്കാനുള്ള അവകാശമുണ്ടെന്ന കാര്യം മറക്കരുതെന്നും ചീഫ് ജസ്റ്റിസ് വ്യക്തമാക്കി.
ഡൽഹിയിലെ പ്രതിഷേധങ്ങളുമായി ബന്ധപ്പെട്ട പൊലീസ് നടപടികൾ ചോദ്യം ചെയ്തുള്ള ഹർജികൾ പരിഗണിക്കുകയായിരുന്നു കോടതി. ഒരു പ്രതിഷേധസംഘത്തിനും സമരസ്ഥലം സ്ഥിരമായി കൈവശപ്പെടുത്തി വെക്കാനാകില്ലെന്ന് ചീഫ് ജസ്റ്റിസ് പറഞ്ഞു. പ്രതിഷേധങ്ങൾക്ക് നിശ്ചിത കാലയളവും സ്ഥലവും അനുവദിക്കുന്ന സംവിധാനം വേണമെന്നും കോടതി നിരീക്ഷിച്ചു.
ജന്തർ മന്തറിന്റെ നിയുക്ത പ്രതിഷേധ വേദി പദവി സർക്കാർ പിൻവലിച്ചതും രാംലീല മൈതാനം ഉൾപ്പെടെ മൂന്ന് ബദൽ സ്ഥലങ്ങൾ കണ്ടെത്തിയതും ഹർജികളിൽ ചർച്ചയായി. പ്രതിഷേധങ്ങൾക്കായി അനുവദിക്കുന്ന സ്ഥലങ്ങളും നിയന്ത്രണങ്ങളും സംബന്ധിച്ച് കോടതിയിൽ രൂക്ഷമായ വാദപ്രതിവാദങ്ങളുണ്ടായി.
വാദത്തിനിടെ അഭിഭാഷകരുടെ ബഹളത്തിൽ ചീഫ് ജസ്റ്റിസ് അതൃപ്തി പ്രകടിപ്പിച്ചു. ‘ഇത് ചന്തയല്ല, ഈ രീതിയിൽ ബഹളം വെക്കരുത്’ എന്ന് അഭിഭാഷകരോട് കോടതി നിർദേശിച്ചു.
വനിതാ മാധ്യമപ്രവർത്തകർക്കെതിരായ അതിക്രമങ്ങളുമായി ബന്ധപ്പെട്ട ഹർജികൾ ഈ മാസം 23ന് പരിഗണിക്കും. പുതിയ ഹർജികളിൽ സുപ്രീംകോടതി നോട്ടീസ് അയച്ചിട്ടുണ്ട്.
ഉത്സവ സീസണിലെ പ്രതിഷേധങ്ങൾക്ക് നിയന്ത്രണം ഏർപ്പെടുത്തണമെന്ന് ആവശ്യപ്പെട്ട് വ്യാപാരി സംഘടനകൾ സമർപ്പിച്ച ഹർജിയിലും കോടതി വാദം കേട്ടു. വിഷയത്തിൽ കേന്ദ്രസർക്കാരിൽ നിന്നും മറ്റ് കക്ഷികളിൽ നിന്നും ബെഞ്ച് പ്രതികരണം തേടി.
പ്രതിഷേധങ്ങൾക്ക് ആഹ്വാനം ചെയ്യുന്ന സംഘാടകർ അതിന്റെ അനന്തരഫലങ്ങൾക്കും ഉത്തരവാദികളായിരിക്കണമെന്ന് കേന്ദ്രസർക്കാരിനുവേണ്ടി ഹാജരായ സോളിസിറ്റർ ജനറൽ തുഷാർ മേത്ത കോടതിയെ അറിയിച്ചു.
പ്രതിഷേധിക്കാനുള്ള പൗരന്മാരുടെ അവകാശവും പൊതുസ്ഥലങ്ങളുടെ ഉപയോഗവും തമ്മിലുള്ള സന്തുലിതാവസ്ഥ ഉറപ്പാക്കേണ്ടതിന്റെ ആവശ്യകതയാണ് കോടതി നിരീക്ഷണങ്ങളിലൂടെ വ്യക്തമാകുന്നത്.
