തിരുവനന്തപുരം: നക്ഷത്ര പദവി ലഭിക്കാത്ത 32 ഹോട്ടലുകളുടെ ബാർ ലൈസൻസുകൾ റദ്ദാക്കുമെന്ന് സർക്കാർ ഹൈക്കോടതിയെ അറിയിക്കും. പഞ്ചനക്ഷത്ര പദവിക്കായി അപേക്ഷ നൽകിയെങ്കിലും പരിശോധനയിൽ യോഗ്യത നേടാത്ത ഹോട്ടലുകൾക്കെതിരെയാണ് നടപടി.

സംസ്ഥാനത്ത് 290 ഹോട്ടലുകളാണ് നക്ഷത്ര പദവിക്കായി അപേക്ഷ നൽകിയത്. ഇതിൽ 32 ഹോട്ടലുകൾക്ക് ആവശ്യമായ യോഗ്യതയില്ലെന്ന് പരിശോധനയിൽ കണ്ടെത്തി. ഇതോടെ ഈ ഹോട്ടലുകൾക്ക് നക്ഷത്ര പദവി നിഷേധിച്ചു. എന്നാൽ നക്ഷത്ര പദവി ലഭിക്കാത്ത ഹോട്ടലുകളിലെ ബാറുകൾ ഇപ്പോഴും പ്രവർത്തിക്കുന്നുണ്ട്. നിലവിൽ മാർച്ച് 30 വരെയാണ് ബാർ ലൈസൻസുകൾ അനുവദിച്ചിരിക്കുന്നത്.

വിഷയത്തിൽ ഹൈക്കോടതിയിൽ അധിക സത്യവാങ്മൂലം സമർപ്പിക്കാൻ എക്സൈസ് മന്ത്രിയുടെ നേതൃത്വത്തിൽ ചേർന്ന യോഗത്തിൽ തീരുമാനമായി. നക്ഷത്ര പദവി ലഭിക്കാത്ത ഹോട്ടലുകളുടെ ബാർ ലൈസൻസുകൾ റദ്ദാക്കുമെന്ന നിലപാടാണ് സർക്കാർ കോടതിയെ അറിയിക്കുക.