തിരുവനന്തപുരം: എംജി സർവകലാശാലയിലെ മാധ്യമ നിയന്ത്രണ വിവാദത്തിൽ വിശദീകരണവുമായി വൈസ് ചാൻസലർ ഡി. മാവൂത്. മാധ്യമങ്ങളെ വിലക്കാനോ വാർത്തകൾ ശേഖരിക്കുന്നത് തടയാനോ സർവകലാശാല തീരുമാനിച്ചിട്ടില്ലെന്ന് വിസി വ്യക്തമാക്കി.
സർവകലാശാലയിലെ പ്രവേശനം കൂടുതൽ സുതാര്യമാക്കുന്നതിനുള്ള നിർദേശമാണ് നൽകിയതെന്നും സന്ദർശകർക്ക് ഏർപ്പെടുത്തിയിട്ടുള്ള നിയന്ത്രണങ്ങൾ മാത്രമാണ് മാധ്യമപ്രവർത്തകർക്കും ബാധകമാക്കിയതെന്നും അദ്ദേഹം പറഞ്ഞു.
മുൻകൂർ അനുമതിയോടെ മാധ്യമപ്രവർത്തകർക്ക് സർവകലാശാലയിൽ പ്രവേശിക്കാം. ഇതിനായി സർവകലാശാലയിലെ പിആർഒയെ മുൻകൂട്ടി അറിയിക്കണം. മാധ്യമപ്രവർത്തകർക്ക് ആവശ്യമായ എല്ലാ സഹായങ്ങളും പിആർഒ ഓഫീസിൽ നിന്ന് ലഭ്യമാക്കുമെന്നും വിസി അറിയിച്ചു.
അതേസമയം, വിസിയുടെ തീരുമാനത്തിനെതിരെ ഉന്നത വിദ്യാഭ്യാസ മന്ത്രി റോജി എം. ജോൺ രംഗത്തെത്തി. മാധ്യമ നിയന്ത്രണവുമായി ബന്ധപ്പെട്ട ഉത്തരവ് അടിയന്തരമായി പിൻവലിക്കണമെന്ന് അദ്ദേഹം ആവശ്യപ്പെട്ടു.
മാധ്യമസ്വാതന്ത്ര്യത്തെ തടയുന്നത് ജനാധിപത്യവിരുദ്ധമായ നടപടിയാണെന്നും ഏകാധിപത്യ പ്രവണതയുടെ ഭാഗമാണിതെന്നും മന്ത്രി വിമർശിച്ചു. സർവകലാശാലകളിൽ ഇത്തരം നടപടികൾ അനുവദിക്കില്ലെന്നും മാധ്യമസ്വാതന്ത്ര്യം സംരക്ഷിക്കപ്പെടണമെന്നും അദ്ദേഹം പറഞ്ഞു. മാധ്യമസ്വാതന്ത്ര്യത്തെ ഹനിക്കാനുള്ള നീക്കങ്ങളെ ശക്തമായി എതിർക്കുമെന്നും ഉത്തരവ് പിൻവലിക്കാൻ സർവകലാശാല അധികൃതർ തയ്യാറാകണമെന്നും മന്ത്രി ആവശ്യപ്പെട്ടു.
