നരേന്ദ്ര മോദിയുടെ ഭരണകാലത്ത് ജീവിതനിലവാരത്തില് മെച്ചം കാണാന് പ്രതീക്ഷിക്കുന്നവരുടെ എണ്ണം കുറയുന്നതായി സര്വേ വ്യക്തമാക്കുന്നു. വരുമാനത്തിലെ കുറവും നിത്യ ചെലവിന്റെ വര്ധനയും കാരണം ആളുകള് നിരാശരാകുന്നതായി ചൂണ്ടിക്കാട്ടുന്നുണ്ട്. കേന്ദ്ര ബജറ്റിന് മുന്നോടിയായി സി-വോട്ടര് സംഘടിപ്പിച്ച സര്വേയിലാണ് കണ്ടെത്തല്. 37 ശതമാനം പേരാണ് അടുത്ത ഒരു വര്ഷത്തില് അവരുടെ ജീവിതനിലവാരം കൂടുതല് താഴ്ന്നിരിക്കും എന്നു കരുതുന്നത്.
2013നു ശേഷം നടത്തിയ സര്വേകളില് ഇത്രയധികം നിരാശയായ അഭിപ്രായങ്ങള് രേഖപ്പെടുത്തിയിരിക്കുന്നത് ഇത് ആദ്യമായാണ്. 5269 പേരാണ് ഈ സര്വെയില് പങ്കെടുത്തത്. ഇവരില് മൂന്നില് രണ്ടുപേര് വിലക്കയറ്റത്തെ കുറിച്ചുള്ള ഒരു കാര്യക്ഷമമായ നടപടി ഉണ്ടാകുന്നതായും പ്രതീക്ഷിക്കുന്നില്ലെന്ന് പറഞ്ഞിട്ടുണ്ട്. ഭക്ഷ്യ വസ്തുക്കളുടെ വിലക്കയറ്റം വീട്ടുചെലവ് വര്ധിപ്പിക്കുകയും ആളുകളുടെ വാങ്ങല്ശേഷി കുറയ്ക്കുകയും ചെയ്തു. സര്വേയില് പങ്കെടുത്ത പകുതിയിലേറെപ്പേര്ക്കും ഒരു വര്ഷത്തിലേറെയായി വരുമാന വര്ധന ഉണ്ടായിട്ടില്ല. നാളെ കേന്ദ്ര സര്ക്കാര് ബജറ്റ് അവതരിപ്പിക്കാനിരിക്കെയാണ് സര്വേ പുറത്തുവന്നത്.
