കോട്ടയം: വോട്ടർ സ്ലിപ്പ് വിതരണം ചെയ്യുന്നതിനിടെ ബിഎൽഒയെ പട്ടി കടിച്ചു. പാമ്പാടി പന്ത്രണ്ടാം മൈലിന് സമീപത്താണ് സംഭവം. വോട്ടർ സ്ലിപ്പുകൾ നൽകാൻ ഭാര്യയോടൊപ്പം വീട്ടിലെത്തിയ ജോയി വർഗീസിനെയാണ് പട്ടി ആക്രമിച്ചത്. പട്ടിയുണ്ടെന്ന വിവരം മുമ്പേ ലഭിച്ചതിനെ തുടർന്ന് ഇരുവരും അനങ്ങാതെ നിന്നെങ്കിലും പട്ടി ജോയിയെ രണ്ടുതവണ കടിച്ചു.
ഉടമ സ്ഥലത്തെത്തി പട്ടിയെ ചങ്ങലയിൽ ആക്കിയെങ്കിലും ആക്രമണം തടയാനായില്ല. തുടർന്ന് ആക്രമണം ശക്തമായപ്പോൾ ജോയിയും ഭാര്യയും ഓടി രക്ഷപ്പെട്ടു. പരിക്കേറ്റ ജോയിയെ ആദ്യം പാമ്പാടി ആശുപത്രിയിലും തുടർന്ന് കോട്ടയം മെഡിക്കൽ കോളേജിലും പ്രവേശിപ്പിച്ചു. ചികിത്സയ്ക്ക് ശേഷം വീട്ടിലേക്ക് മടങ്ങി. സംഭവത്തെ തുടർന്ന് ജോയിക്ക് ഭയം മാറാത്ത നിലയിലാണ്. പരിക്കേറ്റതിനാൽ വോട്ടർ സ്ലിപ്പ് വിതരണം തുടരാൻ കഴിഞ്ഞില്ലെന്നും അദ്ദേഹം പറഞ്ഞു.
