കൊല്ലം: കുണ്ടറ താലൂക്ക് ആശുപത്രിയില് നിര്മ്മാണം പൂര്ത്തിയാക്കിയ ഏഴ് നിലകളുള്ള ബഹുനില കെട്ടിടത്തിന്റെ ഉദ്ഘാടനം ജനുവരി 19 തിങ്കളാഴ്ച രാവിലെ 10.30ന് മുഖ്യമന്ത്രി പിണറായി വിജയന് നിര്വഹിക്കും.ആരോഗ്യ വകുപ്പ് മന്ത്രി വീണാ ജോര്ജ് അധ്യക്ഷത വഹിക്കും.കുണ്ടറ താലൂക്ക് ആശുപത്രിയില് വലിയ വികസനമാണ് നടന്നു വരുന്നതെന്ന് മന്ത്രി വീണാ ജോര്ജ് അറിയിച്ചു. പതിറ്റാണ്ടുകള്ക്ക് മുമ്പ് ഓടിട്ട കെട്ടിടത്തില് പ്രവര്ത്തനം ആരംഭിച്ച ആശുപത്രിയാണ് ഇന്ന് ഈ നിലയിലെത്തിയിരിക്കുന്നതെന്ന് മന്ത്രി പറഞ്ഞു.
കിഫ്ബി ഫണ്ടില് നിന്നും 76.13 കോടി രൂപ വിനിയോഗിച്ചാണ് ബഹുനില കെട്ടിടം യാഥാര്ഥ്യമാക്കിയത്. ബേസ്മെന്റ് ഉള്പ്പെടെ ഏഴ് നിലകളുള്ള കെട്ടിടത്തില് 130 ഓളം കിടക്കകളാണ് സജ്ജമാക്കിയിരിക്കുന്നത്. സ്ഥലപരിമിതി മൂലം ബുദ്ധിമുട്ട് അനുഭവിച്ചിരുന്ന ആശുപത്രിയുടെ ദീര്ഘകാല ആവശ്യമാണ് ഇതോടെ പരിഹരിക്കപ്പെടുന്നത്. കുണ്ടറയിലെയും സമീപ പ്രദേശങ്ങളിലെയും ആയിരക്കണക്കിന് ജനങ്ങള്ക്ക് ഇതു ഏറെ ആശ്വാസകരമാകും.ബേസ്മെന്റ് ഏരിയയില് ഇലക്ട്രിക്കല് റൂം, ഗ്യാസ് മാനിഫോള്ഡ്, ലോണ്ഡ്രി, എസ്.ടി.പി., മോര്ച്ചറി എന്നിവ സജ്ജീകരിച്ചിട്ടുണ്ട്. ഇവിടെ പോസ്റ്റ്മോര്ട്ടം വിഭാഗം, രണ്ട് ഫ്രീസര് മോര്ച്ചറികള്, ഓക്സിജന് പ്ലാന്റ്, ഫയര് റൂം, ബയോ മെഡിക്കല് വേസ്റ്റ് റൂം എന്നിവയും പ്രവര്ത്തിക്കും.
ഗ്രൗണ്ട് ഫ്ളോറില് അത്യാഹിത വിഭാഗം, ഏഴ് കിടക്കകളുള്ള ഒബ്സര്വേഷന് വാര്ഡ്, എക്സ്-റേ, അള്ട്രാസൗണ്ട് സൗകര്യങ്ങള് ഒരുക്കിയിട്ടുണ്ട്. ഒന്നാം നിലയില് മെയില്, ഫീമെയില് വാര്ഡുകളും മെയില്, ഫീമെയില് സര്ജിക്കല് വാര്ഡുകളും പ്രവര്ത്തിക്കും. രണ്ടാം നിലയില് ഒപി വിഭാഗം, ലബോറട്ടറി, ബ്ലഡ് സ്റ്റോറേജ് യൂണിറ്റ്, സി.എസ്.എസ്.ഡി. എന്നിവയാണ്.മൂന്നാം നിലയില് ഓപ്പറേഷന് തിയറ്ററും പോസ്റ്റ് ഓപ്പറേറ്റീവ് വാര്ഡും സജ്ജീകരിച്ചിട്ടുണ്ട്. നാലാം നിലയില് മെയില്, ഫീമെയില് വാര്ഡുകള്, ഡെന്റല് യൂണിറ്റ് എന്നിവയും അഞ്ചാം നിലയില് മെയില്, ഫീമെയില് വാര്ഡുകള്ക്കൊപ്പം പീഡിയാട്രിക് വാര്ഡും പ്രവര്ത്തിക്കും. ആറാം നില പൂര്ണമായും പേ വാര്ഡായിരിക്കും.
1920-കളില് കുണ്ടറ സിറാമിക്സ് ജീവനക്കാരുടെയും പ്രദേശവാസികളുടെയും ആവശ്യത്തിനായി ഡിസ്പെന്സറിയായി ആരംഭിച്ച ആശുപത്രിയാണ് ഇന്ന് വികസന കുതിപ്പിന്റെ നെറുകയിലെത്തിയിരിക്കുന്നത്. കൊല്ലം ജില്ലയിലെ നാല് താലൂക്ക് ആശുപത്രികളില് ഒന്നായ കുണ്ടറ താലൂക്ക് ആശുപത്രി, അടിസ്ഥാന സൗകര്യങ്ങള് വിപുലപ്പെടുത്തിയും ആധുനിക ചികിത്സാ സംവിധാനങ്ങള് ഒരുക്കിയും ആരോഗ്യ രംഗത്ത് പുതിയ ചുവടുവെപ്പിന് ഒരുങ്ങുകയാണ്.
