പൂച്ചാക്കല്: പെരുമ്പളം ദ്വീപ് നിവാസികളുടെ വര്ഷങ്ങളായുള്ള കാത്തിരിപ്പിന് വിരാമമാകുന്നു. പെരുമ്പളം പാലം ഇന്ന് മുഖ്യമന്ത്രി പിണറായി വിജയന് നാടിന് സമര്പ്പിക്കും. കായലിന് കുറുകെ നിര്മ്മിച്ച സംസ്ഥാനത്തെ ഏറ്റവും നീളമേറിയ പാലമാണ് പെരുമ്പളം പാലം.
നാലുവശവും വേമ്പനാട് കായലിനാല് ചുറ്റപ്പെട്ട പെരുമ്പളം ദ്വീപ് നിവാസികളുടെ പതിറ്റാണ്ടുകള് നീണ്ട യാത്രാദുരിതത്തിനാണ് അറുതിയാകുന്നത്. 2016-17 സംസ്ഥാന ബജറ്റില് ഉള്പ്പെടുത്തി കിഫ്ബിയുടെ സാമ്പത്തിക സഹായത്തോടെ 100 കോടി രൂപ ചെലവഴിച്ചാണ് പാലം നിര്മിച്ചത്. പൊതുമരാമത്ത് വകുപ്പ് കെആര്എഫ്ബി വിഭാഗത്തിനായിരുന്നു നിര്മ്മാണ ചുമതല.
