ന്യൂഡല്ഹി: ഡല്ഹിയിലെ വായുമലിനീകരണത്തില് ഇടപെട്ട് പ്രധാനമന്ത്രിയുടെ ഓഫീസ്. മലീനീകരണത്തിന്റെ ഉറവിടവും കാരണങ്ങളും സംബന്ധിച്ച പഠനം വേഗത്തിലാക്കാനാണ് നിര്ദ്ദേശം.
എയര് ക്വാളിറ്റി മാനേജ്മെന്റ് കമ്മീഷനും കേന്ദ്ര മലിനീകരണ നിയന്ത്രണ ബോര്ഡിനുമാണ് നിര്ദേശം നല്കിയിരിക്കുന്നത്.
പൊടി നിയന്ത്രിക്കുന്നതിനായി റോഡ് അറ്റകുറ്റപ്പണികള് വേഗത്തില് പൂര്ത്തിയാക്കുന്നതിനോടൊപ്പം സമയബന്ധിതമായ കര്മ്മ പദ്ധതി തയ്യാറാക്കാനും നിര്ദേശം നല്കി.
പ്രധാനമന്ത്രിയുടെ പ്രിന്സിപ്പല് സെക്രട്ടറി പി കെ മിശ്രയുടെ അധ്യക്ഷതയില് ചേര്ന്ന ഉന്നതതല ടാസ്ക് ഫോഴ്സ് യോഗത്തിലാണ് ഈ നിര്ദ്ദേശങ്ങള് പുറപ്പെടുവിച്ചിരിക്കുന്നത്.
എട്ട് പ്രധാന മന്ത്രാലയങ്ങളിലെ സെക്രട്ടറിമാരും ഡല്ഹിയിലെയും നാല് അയല് സംസ്ഥാനങ്ങളിലെയും ചീഫ് സെക്രട്ടറിമാരും പങ്കെടുത്ത യോഗത്തില് പ്രധാന മലിനീകരണ സ്രോതസ്സുകള് തടയുന്നതിനുള്ള നടപടികള് വിലയിരുത്തുന്നതിലാണ് ശ്രദ്ധ കേന്ദ്രീകരിച്ചത്.
വായു മലിനീകരണത്തിനെതിരായ നിലവിലെ നടപടികള് പഴയ രീതികളെ അടിസ്ഥാനമാക്കിയുള്ളതാണെന്ന് ദേശീയ ഹരിത ട്രൈബ്യൂണലിനെ അറിയിച്ചതിന് തൊട്ടുപിന്നാലെയാണ് പ്രധാനമന്ത്രിയുടെ ഓഫീസ് വിഷയത്തില് ഇടപെട്ടത്.
അതേസമയം ഡല്ഹി വായുമലിനീകരണവുമായി ബന്ധപ്പെട്ട കേസ് ഇന്ന് സുപ്രീംകോടതി പരിഗണിക്കും.
ചീഫ് ജസ്റ്റിസ് സൂര്യകാന്ത് അധ്യക്ഷനായ ബെഞ്ചാണ് വിഷയം പരിഗണിക്കുക. കേസില് തുടര്ച്ചയായി വാദം കേട്ടശേഷം തീരുമാനം എടുക്കാനാണ് കോടതിയുടെ തീരുമാനം.
