തിരുവനന്തപുരം: ലോക ചാമ്പ്യന്മാരായ അര്ജന്റീന ഫുട്ബോള് ടീമിന്റെ കേരള സന്ദര്ശനവുമായി ബന്ധപ്പെട്ട ഉയര്ന്ന വിവാദങ്ങളില് പ്രതികരിച്ച് അര്ജന്റീന ഫുട്ബോള് അസോസിയേഷന്(AFA). അര്ജന്റീന ടീമിനെ കേരളത്തിലെത്തിക്കുന്നതില് കരാര് ലംഘനമുണ്ടായത് കേരള സര്ക്കാരിന്റെ ഭാഗഗത്തു നിന്നാണെന്ന് എഎഫ്എ മാര്ക്കറ്റിംഗ് വിഭാഗം മേധാവി ലിയാന്ഡ്രോ പീറ്റേഴ്സണ് പറഞ്ഞു.
130 കോടി രൂപ എഎഫ്എ കേരളത്തിലെ സ്പോണ്സറില് നിന്ന് വാങ്ങിയെന്നും എന്നിട്ടും കേരളം സന്ദര്ശിക്കുന്നതില് നിന്ന് പിന്മാറി അര്ജന്റീന ടീം കരാര് ലംഘനം നടത്തിയല്ലോ എന്നുമുള്ള മാധ്യമപ്രവര്ത്തകന്റെ ചോദ്യത്തിന് അങ്ങനെയല്ല, അതൊരിക്കലും ശരിയല്ലെന്നാണ് ലിയാന്ഡ്രോ പീറ്റേഴ്സണ് പ്രതികരിച്ചത്. കരാര് ലംഘനം നടത്തിയത് കേരള സര്ക്കാരാണെന്നും പീറ്റേഴ്സണ് പറഞ്ഞു. ഇതു സംബന്ധിച്ച് കൂടുതല് ചോദ്യങ്ങള് ചോദിച്ചെങ്കിലും പീറ്റേഴ്സണ് മറുപടി നല്കിയില്ലെന്നും മാധ്യമപ്രവര്ത്തകന് വ്യക്തമാക്കി.
