ഷില്ലോങ്: ഇന്ത്യ– മ്യാൻമർ അതിർത്തിയിലെ സുരക്ഷ ശക്തമാക്കുന്നതിനും ഭീകരവിരുദ്ധ പ്രവർത്തനങ്ങൾ കൂടുതൽ കാര്യക്ഷമമാക്കുന്നതിനും തീരുമാനങ്ങളുമായി അസം റൈഫിൾസ് കമാൻഡേഴ്സ് സമ്മേളനം സമാപിച്ചു.
ഈ മാസം 12, 13 തീയതികളിൽ ഷില്ലോങ്ങിലെ ലെയ്റ്റ്കോറിലുള്ള അസം റൈഫിൾസ് ആസ്ഥാനത്താണ് രണ്ടുദിവസത്തെ സമ്മേളനം നടന്നത്. അസം റൈഫിൾസ് ഡയറക്ടർ ജനറൽ ലെഫ്റ്റനന്റ് ജനറൽ വികാസ് ലഖേരയുടെ അധ്യക്ഷതയിൽ നടന്ന യോഗത്തിൽ മുതിർന്ന സൈനിക ഉദ്യോഗസ്ഥരും വിവിധ ഫോർമേഷൻ, ബറ്റാലിയൻ കമാൻഡർമാരും പങ്കെടുത്തു.
നിലവിലെ സുരക്ഷാ സാഹചര്യം വിലയിരുത്തുക, സേനയുടെ പ്രവർത്തനശേഷി മെച്ചപ്പെടുത്തുക, പുതിയ സുരക്ഷാ വെല്ലുവിളികൾ നേരിടാനുള്ള തന്ത്രങ്ങൾ രൂപീകരിക്കുക എന്നിവയായിരുന്നു പ്രധാന ലക്ഷ്യങ്ങൾ. ഇന്ത്യ–മ്യാൻമർ അതിർത്തിയിലെ നിരീക്ഷണം ശക്തമാക്കൽ, ഭീകരവിരുദ്ധ പ്രവർത്തനങ്ങൾ കാര്യക്ഷമമാക്കൽ, രഹസ്യാന്വേഷണ ഏജൻസികൾ തമ്മിലുള്ള ഏകോപനം എന്നിവയും ചർച്ചയായി.
സേനയുടെ ആധുനികവത്കരണം, പുതിയ ആയുധങ്ങളും ഉപകരണങ്ങളും സാങ്കേതികവിദ്യകളും ഉപയോഗപ്പെടുത്തൽ, വിവിധ സുരക്ഷാ ഏജൻസികളുടെ സംയുക്ത പ്രവർത്തനം തുടങ്ങിയ വിഷയങ്ങൾക്കും യോഗം പ്രാധാന്യം നൽകി. പരിശീലനം, അടിസ്ഥാന സൗകര്യ വികസനം, സൈനികരുടെ ക്ഷേമം എന്നിവയും ചർച്ച ചെയ്തു.
വിവിധ മേഖലകളിലെ അസം റൈഫിൾസിന്റെ പ്രവർത്തനങ്ങൾ ഡയറക്ടർ ജനറൽ വിലയിരുത്തി. വെല്ലുവിളികൾ നിറഞ്ഞ സാഹചര്യങ്ങളിൽ രാജ്യത്തിന്റെ സുരക്ഷയ്ക്കായി സേനാംഗങ്ങൾ നടത്തുന്ന പ്രവർത്തനങ്ങളെയും അർപ്പണബോധത്തെയും അദ്ദേഹം അഭിനന്ദിച്ചു. രാജ്യസുരക്ഷ കൂടുതൽ ശക്തമാക്കുന്നതിനും സേനയുടെ പ്രവർത്തനശേഷി മെച്ചപ്പെടുത്തുന്നതിനുമുള്ള തീരുമാനങ്ങളോടെയാണ് സമ്മേളനം അവസാനിച്ചത്.
