ഡബ്ലിൻ: അയർലൻഡിലെ ഷാനൻ വിമാനത്താവളംയിൽ അതിക്രമിച്ച് കയറി യു.എസ് സൈനിക ചരക്കുവിമാനത്തിന് നാശനഷ്ടം വരുത്തിയ സംഭവത്തിൽ ഒരാൾ പിടിയിൽ. ടാക്സിവേയിൽ പാർക്ക് ചെയ്തിരുന്ന യു.എസ് വ്യോമസേനയുടെ സി-130 ഹെർക്കുലീസ് വിമാനത്തിനാണ് ആക്രമണം ഉണ്ടായത്.
വിമാനത്താവളത്തിന്റെ സുരക്ഷ മതിൽ കടന്ന് അകത്തുകയറിയ പ്രതി വിമാനത്തിന് മുകളിൽ കയറിയ ദൃശ്യങ്ങൾ സമൂഹമാധ്യമങ്ങളിൽ പ്രചരിച്ചു. സംഭവത്തെ തുടർന്ന് എയർപോർട്ട് പൊലീസ്, അഗ്നിശമന സേന, അയർലൻഡ് പ്രതിരോധ സേന എന്നിവർ സ്ഥലത്തെത്തി ഇയാളെ പിടികൂടി.
ആക്രമണത്തെ തുടർന്ന് വിമാനത്താവള പ്രവർത്തനം ഏകദേശം 30 മിനിറ്റോളം നിർത്തിവെക്കേണ്ടി വന്നു. ഇതോടെ രണ്ട് വിമാനങ്ങൾ വൈകുകയും ഫ്രാൻസിലെ ലൂർദ്ദിൽ നിന്നെത്തിയ ഒരു വിമാനം ലാൻഡിംഗ് അനുമതി ലഭിക്കാതെ ആകാശത്ത് വട്ടംചുറ്റുകയും ചെയ്തു.
യു.എസ് സൈനിക വിമാനങ്ങൾ ഇന്ധനം നിറയ്ക്കുന്നതിനും മറ്റ് ആവശ്യങ്ങൾക്കുമായി ഉപയോഗിക്കുന്ന പ്രധാന കേന്ദ്രമാണ് ഷാനൻ വിമാനത്താവളം. അതീവ സുരക്ഷയുള്ള പ്രദേശത്ത് സുരക്ഷാ വീഴ്ച എങ്ങനെ സംഭവിച്ചു എന്നതിൽ അന്വേഷണം നടക്കുകയാണെന്ന് അധികൃതർ അറിയിച്ചു.
