തിരുവനന്തപുരം: പ്രമുഖ ഓണ്ലൈന് ടാക്സി സര്വീസ് പ്ലാറ്റ്ഫോമായ റാപിഡോ കേരളത്തില് ബൈക്ക് ടാക്സി സര്വീസ് ആരംഭിച്ചതില് പ്രതിഷേധവുമായി ഓട്ടോ, ടാക്സി ഡ്രൈവര് യൂണിയനുകള്. നിലവിലുള്ള ഗതാഗത നിയമങ്ങള് ലംഘിച്ചാണ് ബൈക് ടാക്സി സര്വീസ് നടത്തുന്നതെന്നും ഇത് തങ്ങളുടെ ജീവിതത്തെ ബാധിക്കുമെന്നുമാണ് ഓട്ടോ ടാക്സി ഡ്രൈവര്മാര് പറയുന്നത്.
സംസ്ഥാനത്ത് സ്ത്രീകള്ക്ക് മാത്രമുള്ള ബൈക്ക് ടാക്സി സര്വീസാണ് റാപിഡോ അവതരിപ്പിച്ചത്. ഇതിന് പിന്നാലെ, നാഷണല് ഓണ്ലൈന് ഓട്ടോ ടാക്സി ഡ്രൈവേഴ്സ് യൂണിയന് (എഐടിയുസി) ആണ് തിരുവനന്തപുരം നഗരത്തിലെ റാപ്പിഡോ ഓഫീസിന് മുന്നില് പ്രതിഷേധം സംഘടിപ്പിച്ചത്.
