ലണ്ടൻ: പ്രശസ്ത ബ്രിട്ടീഷ് നോവലിസ്റ്റും മുൻ കൺസർവേറ്റീവ് പാർട്ടി എംപിയുമായ ജെഫ്രി ആർച്ചർ അന്തരിച്ചു. 86 വയസ്സായിരുന്നു. തിങ്കളാഴ്ച ലണ്ടനിലെ വസതിയിൽവച്ചായിരുന്നു അന്ത്യം. അദ്ദേഹത്തിന്റെ പുതിയ നോവലായ ‘ആദം ആൻഡ് ഈവ്’ പുറത്തിറങ്ങാനിരിക്കെയാണ് മരണം. പ്രസാധകരായ ഹാർപ്പർ കോളിൻസ് ആണ് മരണവിവരം അറിയിച്ചത്.
അഞ്ച് പതിറ്റാണ്ടോളം നീണ്ട സാഹിത്യജീവിതത്തിൽ ജെഫ്രി ആർച്ചറുടെ പുസ്തകങ്ങൾ ലോകമെമ്പാടും 30 കോടിയിലധികം കോപ്പികൾ വിറ്റഴിഞ്ഞിട്ടുണ്ട്. ‘കെയ്ൻ ആൻഡ് ഏബൽ’, ‘ക്ലിഫ്ടൺ ക്രോണിക്കിൾസ്’ തുടങ്ങിയവയാണ് അദ്ദേഹത്തിന്റെ പ്രധാന കൃതികൾ.
രാഷ്ട്രീയത്തിലും സജീവമായിരുന്ന ആർച്ചർ കൺസർവേറ്റീവ് പാർട്ടിയിലൂടെയാണ് രംഗത്തെത്തിയത്. 1969-ൽ ലിങ്കൺഷയറിലെ ലൗത്ത് മണ്ഡലത്തിൽ നിന്ന് എംപിയായി തിരഞ്ഞെടുക്കപ്പെട്ടു. പിന്നീട് കൺസർവേറ്റീവ് പാർട്ടിയുടെ ഡെപ്യൂട്ടി ചെയർമാനായും പ്രവർത്തിച്ചു. ഡെയ്ലി സ്റ്റാർ പത്രത്തിനെതിരായ മാനനഷ്ടക്കേസിൽ വ്യാജ തെളിവുകൾ നൽകിയെന്ന കേസിൽ 2001-ൽ ആർച്ചർക്ക് കോടതി ശിക്ഷ വിധിച്ചു. തുടർന്ന് ജയിലിൽ പ്രവേശിച്ച അദ്ദേഹം 2003-ൽ മോചിതനായി.
