പത്തനംതിട്ട: തിരുവല്ല വളഞ്ഞവട്ടത്ത് വിരണ്ടോടിയ പോത്തിന്റെ ആക്രമണത്തിൽ നാല് പേർക്ക് പരിക്കേറ്റു. പരിക്കേറ്റവരിൽ ഒരാൾ ഫയർഫോഴ്സ് ഉദ്യോഗസ്ഥരാണ്. രാവിലെ നാട്ടുകാർ പോത്തിനെ പിടിക്കാൻ ശ്രമിച്ചെങ്കിലും നിയന്ത്രണവിധേയമാക്കാൻ സാധിച്ചില്ല. തുടർന്ന് ഫയർഫോഴ്സും പൊലീസും സ്ഥലത്തെത്തി. രക്ഷാപ്രവർത്തനത്തിനിടെ പോത്ത് ചാടി ആക്രമിക്കുകയായിരുന്നു.
അവസാനം കഴുത്തിൽ കിടന്നിരുന്ന കയർ ഉപയോഗിച്ച് ഫയർഫോഴ്സ് താൽക്കാലികമായി പോത്തിനെ പിടിച്ചുകെട്ടി. വലിയ വടം എത്തിച്ച ശേഷം കൂടുതൽ സുരക്ഷിതമായി കെട്ടി നിയന്ത്രിക്കുമെന്ന് അധികൃതർ അറിയിച്ചു. നാല് പേരുടെയും പരിക്കുകൾ ഗുരുതരമല്ലെന്ന് ആശുപത്രി അധികൃതർ അറിയിച്ചു.
