ന്യൂഡൽഹി: ഡൽഹിയിൽ നടക്കുന്ന പ്രതിഷേധങ്ങളുമായി ബന്ധപ്പെട്ട പൊലീസ് നിയന്ത്രണങ്ങൾ ക്രമസമാധാന പ്രശ്നമാണെന്നും അത് തന്റെ പരിധിയിൽ വരുന്ന വിഷയമല്ലെന്നും സുപ്രീം കോടതി ചീഫ് ജസ്റ്റിസ് സൂര്യകാന്ത്. മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് നടക്കുന്ന സമരങ്ങളെ തടയാൻ പൊലീസ് ഏർപ്പെടുത്തിയ നിയന്ത്രണങ്ങളെക്കുറിച്ചുള്ള മാധ്യമപ്രവർത്തകരുടെ ചോദ്യത്തിന് മറുപടി നൽകുകയായിരുന്നു അദ്ദേഹം.
ഡൽഹിയിൽ ദേശീയ മനുഷ്യാവകാശ കമ്മീഷന്റെ (NHRC) 33-ാം വാർഷികാഘോഷ പരിപാടിക്കിടെയാണ് ചീഫ് ജസ്റ്റിസ് മാധ്യമങ്ങളോട് സംസാരിച്ചത്. വോട്ടർപട്ടികയിലെ പ്രത്യേക തീവ്ര പരിഷ്കരണ (SIR) നടപടികളിലെ ക്രമക്കേടുകൾ ആരോപിച്ചാണ് ഗ്യാനേഷ് കുമാർ രാജിവയ്ക്കണമെന്ന് ആവശ്യപ്പെട്ട് പ്രതിഷേധങ്ങൾ നടക്കുന്നത്. പ്രതിഷേധങ്ങൾ കണക്കിലെടുത്ത് ഡൽഹിയിൽ 20,000ത്തിലധികം സുരക്ഷാ ഉദ്യോഗസ്ഥരെ വിന്യസിച്ചതായും 45 മെട്രോ സ്റ്റേഷനുകൾ അടച്ചതായും റിപ്പോർട്ടുകളുണ്ട്.
ഇന്ത്യ സഖ്യത്തിന്റെ പ്രതിഷേധത്തെക്കുറിച്ചും ചീഫ് ജസ്റ്റിസുമായി കൂടിക്കാഴ്ച നടത്താനുള്ള ആവശ്യത്തെക്കുറിച്ചും മാധ്യമപ്രവർത്തകർ ചോദിച്ചു. സുപ്രീം കോടതിയുടെ വാതിലുകൾ എല്ലാവർക്കുമായി തുറന്നിട്ടിരിക്കുകയാണെന്ന് അദ്ദേഹം പറഞ്ഞു. എന്നാൽ മുഖ്യ തെരഞ്ഞെടുപ്പ് കമ്മീഷണർക്കെതിരായ ആരോപണങ്ങൾ ഉന്നയിക്കാൻ കൂടിക്കാഴ്ച തേടുന്നതിന് പകരം നിയമപരമായ ഹർജിയുമായി കോടതിയെ സമീപിക്കുകയാണ് വേണ്ടതെന്നും അദ്ദേഹം വ്യക്തമാക്കി.
കൂടിക്കാഴ്ച നടത്തണമെന്നാവശ്യപ്പെട്ട് ലഭിച്ച കത്തിന് മറുപടിയായി കൂടിക്കാഴ്ച സാധ്യമല്ലെന്ന് എംപിമാരെ അറിയിച്ചിരുന്നതായും ചീഫ് ജസ്റ്റിസ് പറഞ്ഞു. ഏതൊരു പൗരനും നിയമപരമായ മാർഗത്തിലൂടെ ഹർജി സമർപ്പിച്ച് കോടതിയെ സമീപിക്കാമെന്നും അദ്ദേഹം കൂട്ടിച്ചേർത്തു.
