ന്യൂഡൽഹി: ജന്തർ മന്തറിലെ സിജെപി പ്രതിഷേധവുമായി ബന്ധപ്പെട്ട കേസ് ഡൽഹി പൊലീസ് ക്രൈംബ്രാഞ്ചിന് കൈമാറി. പ്രതിഷേധത്തിനിടെ ജന്തർ മന്തറിൽ അതിക്രമിച്ചുകയറിയെന്നാരോപിച്ച് സൗരവ് ദാസ്, അശുതോഷ് റാങ്ക എന്നിവർക്കെതിരെ രജിസ്റ്റർ ചെയ്ത കേസാണ് ക്രൈംബ്രാഞ്ചിന് കൈമാറിയത്. ഇരുവർക്കും ജാമ്യം നിഷേധിച്ച് മണിക്കൂറുകൾക്കകമാണ് നടപടി.
ജന്തർ മന്തർ പ്രതിഷേധ വേദിയല്ലെന്ന ഉത്തരവിന് പിന്നാലെയായിരുന്നു സിജെപിയുടെ പ്രതിഷേധം. ദേശീയ പതാകയുമായി വേദിയിലെത്തിയ പ്രവർത്തകർ മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ മുദ്രാവാക്യം വിളിച്ചിരുന്നു. ഇതിന് പിന്നാലെയാണ് സൗരവ് ദാസിനെയും അശുതോഷ് റാങ്കയെയും പൊലീസ് കസ്റ്റഡിയിലെടുത്തത്.
അഞ്ച് ദിവസത്തെ കസ്റ്റഡി കാലാവധി അവസാനിച്ചതിനെത്തുടർന്ന് ഇരുവരെയും സ്പെഷ്യൽ എക്സിക്യൂട്ടീവ് മജിസ്‌ട്രേറ്റിന് മുന്നിൽ ഹാജരാക്കി. തുടർന്ന് ജുഡീഷ്യൽ കസ്റ്റഡി രണ്ട് ദിവസത്തേക്ക് കൂടി നീട്ടുകയായിരുന്നു. ബുധനാഴ്ച ഇരുവരെയും വീണ്ടും ഹാജരാക്കും.
സിജെപി നേതാക്കൾക്ക് ജാമ്യം നിഷേധിച്ച നടപടിക്കെതിരെ വിമർശനം ശക്തമായി. യുവ പ്രതിഷേധക്കാരെ ഭയപ്പെടുത്താൻ സർക്കാർ സംവിധാനങ്ങൾ ഉപയോഗിക്കുകയാണെന്ന് അഭിജീത് ദീപ്കെ ആരോപിച്ചു. സമൂഹമാധ്യമങ്ങളിൽ പങ്കുവെച്ച വീഡിയോയിൽ പ്രധാനമന്ത്രി നരേന്ദ്ര മോദിയുടെ നേതൃത്വത്തെ ചോദ്യം ചെയ്ത അദ്ദേഹം സൗരവ് ദാസിന്റെയും അശുതോഷ് റാങ്കയുടെയും നിലപാടിനെ പ്രശംസിക്കുകയും ചെയ്തു.
ജാമ്യം നിഷേധിച്ച സ്പെഷ്യൽ എക്സിക്യൂട്ടീവ് മജിസ്‌ട്രേറ്റിന്റെ ഉത്തരവിനെ സിജെപി ലീഗൽ കറസ്പോണ്ടന്റ് രത്ന സിങ് വിമർശിച്ചു. ഉത്തരവ് കോടതിയിൽ ചോദ്യം ചെയ്യുമെന്നും അവർ വ്യക്തമാക്കി.
ജാമ്യം നിഷേധിക്കാൻ ജാമ്യബോണ്ടിലെ ചിത്രത്തിലെ വ്യത്യാസവും മാതാപിതാക്കളുടെ വിവരങ്ങളിലെ വ്യക്തതക്കുറവും കാരണമായി ചൂണ്ടിക്കാട്ടിയെന്നാണ് രത്ന സിങ്ങിന്റെ ആരോപണം. ഒരു പൊലീസ് ഉദ്യോഗസ്ഥന് എങ്ങനെ ജുഡീഷ്യൽ കസ്റ്റഡി വിധിക്കാൻ കഴിയുമെന്ന ചോദ്യവും അവർ ഉന്നയിച്ചു.
കേസ് ക്രൈംബ്രാഞ്ചിന് കൈമാറിയതും ജാമ്യം നിഷേധിച്ചതും പ്രതിഷേധവുമായി ബന്ധപ്പെട്ട നിയമനടപടികളെ കൂടുതൽ ശ്രദ്ധാകേന്ദ്രമാക്കിയിരിക്കുകയാണ്.
