മഴക്കെടുതി നേരിട്ട് വിലയിരുത്താൻ മുഖ്യമന്ത്രി വി.ഡി. സതീശന് നടത്തിയ ചാര്ട്ടേഡ് വിമാന യാത്ര രാഷ്ട്രീയമായി വലിയ വിവാദങ്ങളിലേക്ക് നീങ്ങുന്നു. സംഭവത്തിലുടനീളം പൊതിഞ്ഞുനിൽക്കുന്ന അടിമുടി ദുരൂഹതയാണ് കാര്യങ്ങളുടെ ഗൗരവം കൂട്ടുന്നത്. പൊതുഖജനാവിന് ചിലവില്ലെന്ന് പറയുമ്പോഴും സ്വകാര്യ വ്യക്തികളുടെയും കമ്പനികളുടെയും സൗജന്യ സേവനം മുഖ്യമന്ത്രി സ്വീകരിക്കുന്നത് നിയമപരമായും ധാര്മ്മികമായും ചോദ്യം ചെയ്യപ്പെടുകയാണ്. ആരാണ് ആ സ്പോൺസർ എന്ന് പറയാൻ മുഖ്യമന്ത്രിക്കോ ഓഫീസിനോ കഴിയുന്നില്ലേ എന്ന ചോദ്യം ഉയർന്നു കഴിഞ്ഞു. പ്രതിപക്ഷം വിഷയം കടുപ്പിക്കുന്നതോടെ ഈ വിമാനയാത്രകള് വി.ഡി. സതീശന് വരും ദിവസങ്ങളില് വലിയ കുരുക്കായി മാറുമെന്നുറപ്പ്.
ബംഗളൂരുവില് നിന്ന് പ്രത്യേകമായി എത്തിച്ച ചാര്ട്ടേഡ് വിമാനത്തിലാണ് ഇന്നലെ ഉച്ചയ്ക്ക് രണ്ടോടെ മുഖ്യമന്ത്രി കരിപ്പൂരിലേക്ക് തിരിച്ച് വൈകിട്ട് ആറരയോടെ തലസ്ഥാനത്ത് മടങ്ങിയെത്തിയത്. അടിയന്തര സാഹചര്യത്തില് കരിപ്പൂരിലേക്ക് കൃത്യസമയത്ത് യാത്രാവിമാനങ്ങള് ലഭ്യമല്ലാത്തതിനാലാണ് പ്രത്യേക വിമാനം ഏര്പ്പെടുത്തിയതെന്നാണ് മുഖ്യമന്ത്രിയുടെ ഓഫീസിന്റെ ഔദ്യോഗിക വിശദീകരണം. എന്നാല് ഒരു സംസ്ഥാനത്തിന്റെ മുഖ്യമന്ത്രിക്ക് സ്വകാര്യ കമ്പനികളുടെ സൗജന്യ വാഗ്ദാനങ്ങള് സ്വീകരിക്കാമോ എന്ന ചോദ്യമാണ് ഉയരുന്നത്. സ്വകാര്യ വ്യക്തികളുടെ സൗജന്യം ഔദ്യോഗിക കാര്യങ്ങള്ക്ക് ഉപയോഗിക്കുന്നത് അഴിമതിയും സത്യപ്രതിജ്ഞാ ലംഘനവുമെന്നാണ് പ്രതിപക്ഷത്തിന്റെ വിമര്ശനം. മന്ത്രിമാരുടെ വിദേശയാത്രയിലും മന്ത്രി കെ എം ഷാജിയുടെ ആഡംബര വാഹന ഉപയോഗത്തിലും വിമര്ശനം ഉയരുന്നതിനിടെയാണ് മുഖ്യമന്ത്രിയുടേയും യാത്ര. പൂക്കി സര്ക്കാര് ‘ഓശാരം’ സര്ക്കാര് എന്നായിരുന്നു കെടി ജലീലിന്റെ പരിഹാസം.
സംസ്ഥാനത്തിന് ഒരു രൂപയുടെ പോലും സാമ്പത്തിക ബാധ്യതയില്ലെന്നും സര്ക്കാരിന്റെ അഭ്യര്ത്ഥന കണക്കിലെടുത്ത് വിമാന കമ്പനി സൗജന്യ സേവനം നല്കിയതാണെന്നുമാണ് സര്ക്കാര് വൃത്തങ്ങള് നല്കുന്ന സൂചന. എന്നാല് കോടികള് വാടകയുള്ള ആഡംബര വിമാനം സൌജന്യമായി നല്കിയ സ്പോണ്സര് ആരാണെന്ന വിവരങ്ങള് സര്ക്കാര് ഇതുവരെ ഔദ്യോഗികമായി പുറത്തുവിട്ടിട്ടില്ല. ഈ നിഗൂഢതയാണ് പ്രതിപക്ഷത്തിന്റെ ആരോപണങ്ങള്ക്ക് ശക്തി പകരുന്നത്. കഴിഞ്ഞ ശനിയാഴ്ചയോടെ പോലീസ് ഹെലികോപ്റ്ററിന്റെ വാടകക്കരാര് കാലാവധി അവസാനിക്കുകയും സര്ക്കാര് അത് പുതുക്കാതിരിക്കുകയും ചെയ്തിരുന്നു. ഈ പശ്ചാത്തലത്തിലാണ് പെട്ടെന്നുണ്ടായ മലപ്പുറത്തെ കനത്ത മഴയും മലവെള്ളപ്പാച്ചിലും സൃഷ്ടിച്ച നാശനഷ്ടങ്ങള് നേരിട്ട് വിലയിരുത്താന് മുഖ്യമന്ത്രിക്ക് ചാര്ട്ടേഡ് വിമാനത്തെ ആശ്രയിക്കേണ്ടി വന്നത്. എന്നാല് ഹെലികോപ്റ്റര് കരാര് പുതുക്കാതിരുന്നതിലെ വീഴ്ച മറയ്ക്കാനാണോ ഇത്തരം സൗജന്യ യാത്രകള് എന്ന വിമര്ശനവും ഉയരുന്നുണ്ട്.
ബംഗളൂരു ആസ്ഥാനമായി പ്രവര്ത്തിക്കുന്ന കേളചന്ദ്ര ലോജിസ്റ്റിക്സ് എന്ന കമ്പനിയുടെ വിമാനമാണ് മുഖ്യമന്ത്രിയുടെ യാത്രയ്ക്കായി ഉപയോഗിച്ചതെന്നാണ് പുറത്തുവരുന്ന വിവരങ്ങള്. നാലുപേര്ക്ക് സഞ്ചരിക്കാവുന്ന എംബ്രയർ ഇ.എം.ബി-500 ഫേനം 100 എന്ന അത്യാധുനിക ചെറുവിമാനത്തിലായിരുന്നു മുഖ്യമന്ത്രിയുടെ യാത്ര. സ്വകാര്യ കമ്പനിയുടെ വിമാനം ഭരണാധികാരി ഉപയോഗിക്കുമ്പോള് അതിന് പിന്നിലെ താല്പര്യങ്ങള് എന്തെന്ന ചോദ്യവും സജീവമാണ്. കര്ണാടക ഊര്ജ മന്ത്രിയും മലയാളിയുമായ കെ. ജെ. ജോര്ജ് തുടങ്ങിയതാണ് ഈ വിമാന കമ്പനിയെന്നാണ് ലഭ്യമാകുന്ന സൂചനകള്. തിരുവനന്തപുരം, കരിപ്പൂര് വിമാനത്താവളങ്ങളില് ലാന്ഡിംഗ്, പാര്ക്കിംഗ്, ടേക്ക് ഓഫ് ഫീസിനത്തില് മാത്രം ഒരു ലക്ഷത്തോളം രൂപ ചെലവ് വരും. സാധാരണ ഗതിയില് ഇത്തരം ഒരു ചാര്ട്ടേഡ് വിമാനയാത്രയ്ക്ക് 10 ലക്ഷത്തോളം രൂപ വാടകയിനത്തില് നല്കേണ്ടതുണ്ട്.
സൗജന്യ യാത്രയാണെന്ന് വാദിക്കുമ്പോഴും സ്വകാര്യ ലോജിസ്റ്റിക്സ് കമ്പനിയുടെ സ്പോണ്സര്ഷിപ്പില് മുഖ്യമന്ത്രി യാത്ര ചെയ്തത് വന് ചട്ടലംഘനമാണെന്ന ആരോപണവുമായി ഇടത് വശത്തുനിന്നും വിമര്ശനങ്ങള് ഉയര്ന്നിട്ടുണ്ട്. എസ്.എഫ്.ഐ. സംസ്ഥാന സെക്രട്ടറി പി.എസ്. സഞ്ജീവ് ഉള്പ്പെടെയുള്ളവര് മുഖ്യമന്ത്രിയുടെ ഈ നടപടിക്കെതിരെ പരസ്യമായി രംഗത്തെത്തിക്കഴിഞ്ഞു. ഔദ്യോഗിക പദവിയിലിരിക്കുന്ന ഒരാള് കോടികളുടെ വാടകയുള്ള സേവനം സൗജന്യമായി പറ്റി എന്നത് ഭാവിയില് അഴിമതി ആരോപണങ്ങള്ക്ക് വഴിതുറക്കുമെന്നാണ് വിമര്ശകരുടെ പക്ഷം. മുഖ്യമന്ത്രിയെ ന്യായീകരിച്ച് മന്ത്രിമാരായ സണ്ണി ജോസഫും കെ മുരളീധരനും രംഗത്തെത്തിയിട്ടുണ്ട്.
ഖജനാവിന് നഷ്ടമുണ്ടാകില്ലെന്ന കേവലം സാങ്കേതിക വാദമുയർത്തി നിയമക്കുരുക്കുകളിൽ നിന്നും രാഷ്ട്രീയ ആരോപണങ്ങളിൽ നിന്നും സർക്കാരിന് അത്രയെളുപ്പം ഊരിപ്പോരാൻ സാധിക്കില്ല. സൗജന്യങ്ങൾ നൽകുന്ന സ്വകാര്യ കമ്പനിക്ക് ഭാവിയിൽ സർക്കാർ തലത്തിൽ എന്തെങ്കിലും വലിയ ആനുകൂല്യങ്ങളോ വഴിവിട്ട സഹായങ്ങളോ ലഭിക്കുമോ എന്ന ന്യായമായ സംശയം പൊതുസമൂഹത്തിൽ വീണ്ടും ശക്തിപ്പെടുകയാണ്. അതുകൊണ്ടുതന്നെ, സ്പോൺസറുടെ വിവരങ്ങളും ഇതിന് പിന്നിലെ താൽപ്പര്യങ്ങളും സുതാര്യമായി പരസ്യപ്പെടുത്താൻ സർക്കാർ തയ്യാറാകണമെന്ന ആവശ്യത്തിനും പിന്തുണയേറുന്നു.
പ്രതിപക്ഷവും മറ്റ് രാഷ്ട്രീയ എതിരാളികളും ഈ വിഷയത്തെ വരുംദിവസങ്ങളിൽ സർക്കാരിനെതിരെയുള്ള ഏറ്റവും ശക്തമായ ആയുധമാക്കി മാറ്റാനാണ് പദ്ധതിയിടുന്നത്. സർക്കാരിന്റെ സാമ്പത്തിക പ്രതിസന്ധിയും ധൂർത്തും ജനമധ്യത്തിൽ കനത്ത ചർച്ചയാകുന്ന ഈ വേളയിൽ, മുഖ്യമന്ത്രിയുടെ ആഡംബര വിമാനയാത്ര തെരുവിൽ വലിയ പ്രതിഷേധങ്ങൾക്കും പ്രക്ഷോഭങ്ങൾക്കും തിരികൊളുത്തുമെന്ന കാര്യം ഉറപ്പാണ്. ഇതിനുപുറമേ, ഔദ്യോഗിക പദവിയും ഭരണഘടനാ തത്വങ്ങളും കാറ്റിൽപ്പറത്തിയ നടപടിക്കെതിരെ കോടതിയെ സമീപിക്കാനുള്ള നീക്കത്തിലാണ് വിവിധ സംഘടനകൾ. അടിയന്തര സാഹചര്യങ്ങളുടെ മറവിൽ ഇനി വരുംദിവസങ്ങളിലും സമാനമായ സൗജന്യ ചാർട്ടേഡ് യാത്രകൾ മുഖ്യമന്ത്രി തുടരുമോ എന്നതാണ് ഏവരും ഉറ്റുനോക്കുന്നത്.
പൊതുജനമധ്യത്തിലും ഭരണസിരാകേന്ദ്രങ്ങളിലും ഈ വിഷയം വലിയ ചോദ്യചിഹ്നങ്ങൾ ഉയർത്തിക്കഴിഞ്ഞ സാഹചര്യത്തിൽ, സ്വകാര്യ പ്രീണന യാത്രകളിൽ നിന്ന് മുഖ്യമന്ത്രി പിന്മാറുമോ അതോ പഴയ സാങ്കേതിക ന്യായങ്ങളിൽ പിടിച്ച് നിൽക്കുമോ എന്ന് വരുംദിവസങ്ങളിലെ പ്രക്ഷുബ്ധമായ രാഷ്ട്രീയ സാഹചര്യങ്ങൾ തീരുമാനിക്കും.
