തിരുവനന്തപുരം: മലപ്പുറം ജില്ലയെക്കുറിച്ചുള്ള സിപിഐഎം നേതാവ് പി. നന്ദകുമാറിന്റെ വിവാദ പരാമർശം രാഷ്ട്രീയമായി ശരിയല്ലെന്ന് സിപിഐ സംസ്ഥാന സെക്രട്ടറി ബിനോയ് വിശ്വം. മലപ്പുറം മതമൗലികവാദികളുടെയും വർഗീയവാദികളുടെയും കൂടാണെന്ന നന്ദകുമാറിന്റെ പരാമർശത്തിനെതിരെയാണ് സിപിഐ നിലപാട് വ്യക്തമാക്കിയത്.
ഒരു കമ്മ്യൂണിസ്റ്റ് നേതാവ് ഇത്തരമൊരു പരാമർശം നടത്താൻ പാടില്ലായിരുന്നുവെന്ന് ബിനോയ് വിശ്വം പറഞ്ഞു. മലപ്പുറം ജില്ലയെ വർഗീയതയുടെ കൂടെന്ന് വിശേഷിപ്പിക്കുന്നത് രാഷ്ട്രീയമായി ശരിയല്ല. ഇത്തരം രാഷ്ട്രീയ തെറ്റ് ചെയ്യാൻ കമ്മ്യൂണിസ്റ്റ് നേതാവിന് അവകാശമില്ലെന്നും നന്ദകുമാറും പാർട്ടിയും തെറ്റ് തിരുത്തുമെന്നാണ് പ്രതീക്ഷയെന്നും അദ്ദേഹം വ്യക്തമാക്കി.
അതേസമയം, തന്റെ പ്രസ്താവന വളച്ചൊടിച്ചതാണെന്ന് പി. നന്ദകുമാർ പ്രതികരിച്ചു. മലപ്പുറത്തെ വർഗീയവാദികളുടെ കൂടാക്കി മാറ്റാനുള്ള ശ്രമം നടക്കുന്നുവെന്നാണ് താൻ ഉദ്ദേശിച്ചതെന്നും ബിജെപിയും മുസ്‌ലിം ലീഗും ഇത്തരം ശ്രമങ്ങൾ നടത്തുന്നുണ്ടെന്നും അദ്ദേഹം ആരോപിച്ചു. മലപ്പുറത്ത് നടക്കാനിരിക്കുന്ന കുംഭമേളയും ഇതിന്റെ ഭാഗമാണെന്നും നന്ദകുമാർ പറഞ്ഞു. എന്നാൽ പ്രസ്താവനയിൽ തിരുത്തലോ ഖേദപ്രകടനമോ അദ്ദേഹം നടത്തിയില്ല.
സിപിഐഎമ്മിന്റെ വിപുലീകൃത ജില്ലാ കമ്മിറ്റി യോഗത്തിലെ സ്വാഗത പ്രസംഗത്തിനിടെയായിരുന്നു നന്ദകുമാറിന്റെ വിവാദ പരാമർശം. മതമൗലിക വർഗീയവാദികളുടെ കൂടാണ് മലപ്പുറം ജില്ലയെന്നും അതിനെ പ്രതിരോധിച്ച് മതനിരപേക്ഷ പ്രസ്ഥാനങ്ങളെ യോജിപ്പിച്ച് മുന്നോട്ടുപോകേണ്ടത് കമ്മ്യൂണിസ്റ്റ് പാർട്ടിയുടെ രാഷ്ട്രീയ കടമയാണെന്നുമായിരുന്നു അദ്ദേഹത്തിന്റെ പരാമർശം.
പരാമർശത്തിനെതിരെ പാർട്ടിക്കുള്ളിലും പുറത്തും പ്രതിഷേധം ശക്തമാണ്. നന്ദകുമാറിന്റെ പ്രസ്താവനയ്‌ക്കെതിരെ പ്രതിപക്ഷ നേതാവ് വി.ഡി. സതീശനും രംഗത്തെത്തി. നന്ദകുമാറിന്റെ നിലപാട് സിപിഐഎമ്മിന്റെയും പിണറായി വിജയന്റെയും നിലപാടാണെന്ന് കരുതേണ്ട സാഹചര്യമാണെന്നും അദ്ദേഹം ആരോപിച്ചു.
നന്ദകുമാറിനെതിരെ നടപടി ആവശ്യപ്പെട്ട് യൂത്ത് ലീഗ്, എംഎസ്എഫ് പ്രവർത്തകരും പരാതി നൽകിയിട്ടുണ്ട്. മതത്തിന്റെ അടിസ്ഥാനത്തിൽ ശത്രുത വളർത്തൽ ഉൾപ്പെടെയുള്ള വകുപ്പുകൾ പ്രകാരം നടപടി വേണമെന്നാണ് പരാതിയിലെ ആവശ്യം. വിഷയത്തിൽ പൊലീസ് പരിശോധനയും തുടരുകയാണ്.
