അബുദാബി: സൗദി അറേബ്യയിലെ വിമാനത്താവളങ്ങൾക്ക് നേരെ ഹൂതി വിമതരുടെ ആക്രമണ ഭീഷണി തുടരുന്ന സാഹചര്യത്തിൽ വിമാന സർവീസുകൾ റദ്ദാക്കുന്നത് നവംബർ 5 വരെ നീട്ടി ഇത്തിഹാദ് എയർവേയ്സ്. അബുദാബിയിൽനിന്ന് സൗദിയിലെ റിയാദ്, ദമ്മാം നഗരങ്ങളിലേക്കുള്ള എല്ലാ വിമാന സർവീസുകളും ഈ കാലയളവിൽ റദ്ദാക്കിയിട്ടുണ്ട്.
അബുദാബിക്കും ജിദ്ദയ്ക്കുമിടയിൽ സർവീസ് നടത്തുന്ന EY601, EY602, EY603, EY604 എന്നീ വിമാനങ്ങളും റദ്ദാക്കിയിട്ടുണ്ട്. എന്നാൽ ഇത്തിഹാദിന്റെ ഫ്ലൈറ്റ് ട്രാക്കർ വിവരങ്ങൾ പ്രകാരം EY615, EY611 എന്നീ വിമാനങ്ങൾ നിലവിൽ സർവീസ് നടത്തുന്നുണ്ട്.
സാഹചര്യങ്ങൾ അതിവേഗം മാറുന്നതിനാൽ വിമാന സർവീസുകളിൽ കൂടുതൽ മാറ്റങ്ങൾ ഉണ്ടായേക്കാമെന്ന് ഇത്തിഹാദ് അറിയിച്ചു. യാത്രക്കാർ വിമാനങ്ങളുടെ പുതുക്കിയ വിവരങ്ങൾ ഔദ്യോഗിക വെബ്സൈറ്റിലൂടെ പരിശോധിക്കണം. സർവീസ് റദ്ദാക്കിയതിനെ തുടർന്ന് യാത്ര മുടങ്ങിയവർക്ക് ബദൽ യാത്രാസൗകര്യങ്ങൾ ഒരുക്കാൻ ശ്രമിക്കുന്നുണ്ടെന്നും കമ്പനി വ്യക്തമാക്കി.
സൗദിയിലെ പ്രധാന വിമാനത്താവളങ്ങളെ ലക്ഷ്യമിട്ട് ഹൂതി വിമതർ ആക്രമണം നടത്തുന്നതായാണ് റിപ്പോർട്ട്. സൗദി അധികൃതർ നൽകിയ വിവരമനുസരിച്ച് ഒക്ടോബർ ആദ്യം മുതൽ ഇത്തരം ആക്രമണങ്ങളിൽ 21 പേർ കൊല്ലപ്പെട്ടിട്ടുണ്ട്. ഒക്ടോബർ 10ന് റിയാദിലെ കിങ് ഖാലിദ് അന്താരാഷ്ട്ര വിമാനത്താവളത്തിന് നേരെയുണ്ടായ മിസൈൽ ആക്രമണത്തിൽ 13 പേർ കൊല്ലപ്പെടുകയും 308 പേർക്ക് പരിക്കേൽക്കുകയും ചെയ്തതായും റിപ്പോർട്ടിൽ പറയുന്നു.
