തിരുവനന്തപുരം: സ്ത്രീകൾക്ക് കെഎസ്ആർടിസി ഓർഡിനറി ബസുകളിൽ സൗജന്യ യാത്ര അനുവദിക്കുന്ന പ്രിയദർശിനി യാത്രാ പദ്ധതിക്ക് നാളെ നൂറ് ദിവസം പൂർത്തിയാകും. സ്ത്രീകളുടെ യാത്രാചെലവിന്റെ ഭാരം കുറയ്ക്കുന്നതിനൊപ്പം കൂടുതൽ സ്ത്രീകളെ പൊതുഗതാഗത സംവിധാനത്തിലേക്ക് ആകർഷിക്കുക എന്ന ലക്ഷ്യത്തോടെയാണ് 2026 ജൂൺ 15ന് പദ്ധതി ആരംഭിച്ചത്.
പദ്ധതി നിലവിൽ വന്നതോടെ കെഎസ്ആർടിസി ഓർഡിനറി ബസുകളിലെ സ്ത്രീ യാത്രക്കാരുടെ എണ്ണത്തിൽ 60 ശതമാനം വർധനയുണ്ടായതായി കണക്കുകൾ വ്യക്തമാക്കുന്നു. ദൈനംദിന യാത്രകൾക്ക് കെഎസ്ആർടിസിയെ ആശ്രയിക്കുന്ന സ്ത്രീകൾക്ക് സാമ്പത്തിക ആശ്വാസം നൽകുന്നതിനൊപ്പം വിദ്യാഭ്യാസം, തൊഴിൽ, ചികിത്സ തുടങ്ങിയ വിവിധ ആവശ്യങ്ങൾക്കായി യാത്ര ചെയ്യുന്നവർക്കും പദ്ധതി സഹായകരമായി.
സൗജന്യ യാത്രാ സൗകര്യം കൂടുതൽ സ്ത്രീകളെ പൊതുഗതാഗത സംവിധാനത്തെ ആശ്രയിക്കാൻ പ്രേരിപ്പിച്ചെന്നാണ് വിലയിരുത്തൽ. സുരക്ഷിതവും സൗകര്യപ്രദവും ചെലവുകുറഞ്ഞതുമായ യാത്ര ഉറപ്പാക്കുന്നതിലൂടെ സ്ത്രീകളുടെ സാമൂഹിക, സാമ്പത്തിക ശാക്തീകരണത്തിന് പിന്തുണ നൽകുകയാണ് പദ്ധതിയുടെ ലക്ഷ്യം.
നൂറ് ദിവസം പൂർത്തിയാക്കുമ്പോൾ കൂടുതൽ സ്ത്രീകളെ പൊതുഗതാഗത സംവിധാനത്തിന്റെ ഭാഗമാക്കാനും കെഎസ്ആർടിസി സേവനങ്ങൾ കൂടുതൽ ജനസൗഹൃദമാക്കാനും പ്രിയദർശിനി പദ്ധതിക്ക് കഴിഞ്ഞെന്നാണ് കോർപ്പറേഷന്റെ വിലയിരുത്തൽ.
