കണ്ണൂര് : കണ്ണൂര് രാജ്യാന്തര വിമാനത്താവളത്തില് യാത്രക്കാരുടെ എണ്ണത്തില് വര്ധന.കഴിഞ്ഞ സാമ്പത്തികവര്ഷത്തെ വരുമാനം 93 ശതമാനവും യാത്രക്കാരുടെ എണ്ണം 27 ശതമാനവും വര്ധിച്ചു. 13.4 ലക്ഷം യാത്രക്കാരാണ് 2024-25 വര്ഷം കണ്ണൂര് വിമാനത്താവളം വഴി യാത്രചെയ്തത്. ആകെ 11,430 വിമാനസര്വീസുകളാണ് നടത്തിയത്. 195 കോടി രൂപയുടെ വരുമാനമാണ് 2024-25 വര്ഷത്തില് കിയാലിനുണ്ടായത്. 101 കോടി രൂപയായിരുന്നു 2023-24 വര്ഷത്തെ വരുമാനം.
ഈ സാമ്പത്തിക വര്ഷം 20 ലക്ഷം യാത്രക്കാരും 250 കോടി രൂപ വരുമാനവുമാണ് കിയാല് ലക്ഷ്യമിടുന്നത്. രാജ്യാന്തര സര്വീസുകളുടെ എണ്ണത്തില് 32 ശതമാനവും ചരക്കുനീക്കത്തില് 25 ശതമാനവും വര്ധനയുണ്ടായി. ആകെ 4150 ടണ് ചരക്കുനീക്കമാണ് കഴിഞ്ഞ സാമ്പത്തിക വര്ഷമുണ്ടായത്.
ഒരുവര്ഷത്തിനിടെ ഒട്ടേറെ പുതിയ സര്വീസുകളും കണ്ണൂര് വിമാനതാവളത്തില് ആരംഭിച്ചു.. ഡല്ഹി, ഫുജൈറ, മസ്കത്ത്, ദമാം എന്നിവിടങ്ങളിലേക്ക് ഇന്ഡിഗോ എയര്ലൈന്സ് സര്വീസുകള് തുടങ്ങി. മുംബൈ, ഹൈദരാബാദ് എന്നിവിടങ്ങളിലേക്ക് എയര് ഇന്ത്യ എക്സ്പ്രസും സര്വീസുകള് തുടങ്ങി. കൂടുതല് സര്വീസുകള് തുടങ്ങാനായി ആകാശ് എയര്, സ്പൈസ് ജെറ്റ്, എയര് കേരള, അല്ഹിന്ദ് എയര്, സ്പിരിറ്റ് എയര് തുടങ്ങിയ കമ്പനികളുമായി ചര്ച്ച പുരോഗമിക്കുകയാണ്.
എയര്പോര്ട്സ് കൗണ്സില് ഇന്റര്നാഷണല് 2024ല് നടത്തിയ എയര്പോര്ട്ട് സര്വീസ് ക്വാളിറ്റി സര്വേയില് ഏഷ്യ-പസിഫിക് മേഖലയിലെ മികച്ച വിമാനത്താവളമായി കണ്ണൂര് തിരഞ്ഞെടുക്കപ്പെട്ടിരുന്നു. 20 ലക്ഷം യാത്രക്കാരില് കുറവുള്ള വിമാനത്താവളങ്ങളുടെ വിഭാഗത്തിലായിരുന്നു കിയാലിന്റെ നേട്ടം.
