കുവൈത്ത് സിറ്റി: കുവെെത്തിലെ ഇന്ത്യൻ പൗരന്മാർക്ക് അഞ്ചുവർഷം കാലാവധിയുളള ഇ-വിസാ സംവിധാനം ആരംഭിച്ചു. കുവൈത്തിലെ ഇന്ത്യൻ എംബസിയാണ് ഈ വിവരം ഔദ്യോഗികമായി അറിയിച്ചത്.

ഇ-വിസ സംവിധാനം വന്നതോടെ ഇന്ത്യാ സന്ദർശനത്തിന് ആവശ്യമായ വിസക്ക് കുവൈത്ത് പൗരന്മാർക്ക് പൂർണ്ണമായും ഓൺലൈനായി അപേക്ഷിക്കാവുന്നതാണ്. ഇന്ത്യൻ സർക്കാരിന്റെ ഔദ്യോഗിക വിസാ പോർട്ടൽ വഴിയാണ് അപേക്ഷ നൽകേണ്ടത്.

വിസാ ഫീസ് കാലാവധിക്ക് അനുസരിച്ച് വ്യത്യാസപ്പെടുന്നു. അഞ്ച് വർഷത്തെ ഇ-വിസയ്ക്ക് 80 യുഎസ് ഡോളറും, കുറഞ്ഞ കാലാവധിയുള്ളവയ്ക്ക് 40 യുഎസ് ഡോളറും പ്രാരംഭ നിരക്കായി നിശ്ചയിച്ചിട്ടുണ്ട്. സാധാരണ സാഹചര്യത്തിൽ അപേക്ഷ പ്രോസസ്സിംഗ് മൂന്ന് മുതൽ നാല് ദിവസത്തിനുള്ളിൽ പൂർത്തിയാകും. ഇന്ത്യയിലെത്തുമ്പോൾ യാത്രക്കാരുടെ ബയോമെട്രിക് വിവരങ്ങൾ ശേഖരിക്കും.