ഹരാരെ: സിംബാബ്വെക്കെതിരായ ആദ്യ ടി20 മത്സരത്തിൽ ഇന്ത്യക്ക് 126 റൺസ് വിജയലക്ഷ്യം. ഹരാരെ സ്പോർട്സ് ക്ലബിൽ ടോസ് നഷ്ടപ്പെട്ട് ബാറ്റിങ്ങിനിറങ്ങിയ സിംബാബ്വെ നിശ്ചിത ഓവറിൽ ഏഴ് വിക്കറ്റ് നഷ്ടത്തിൽ 125 റൺസെടുത്തു.
ഇന്ത്യക്കായി മായങ്ക് യാദവ് തകർപ്പൻ ബൗളിങ്ങാണ് പുറത്തെടുത്തത്. നാല് ഓവറിൽ 18 റൺസ് മാത്രം വഴങ്ങി രണ്ട് വിക്കറ്റുകൾ വീഴ്ത്തിയ മായങ്ക് സിംബാബ്വെ ബാറ്റിങ് നിരയെ സമ്മർദ്ദത്തിലാക്കി. പ്രിൻസ് യാദവും രണ്ട് വിക്കറ്റ് നേടി.
34 പന്തിൽ 39 റൺസെടുത്ത വെസ്ലി മധെവേരെയാണ് സിംബാബ്വെയുടെ ടോപ് സ്കോറർ. റയാൻ ബേൾ 35 പന്തിൽ 29 റൺസും തദിവനാഷി മരുമാനി 20 പന്തിൽ പുറത്താകാതെ 27 റൺസും നേടി.
പവർപ്ലേ അവസാനിക്കുന്നതിന് മുമ്പ് തന്നെ സിംബാബ്വെയ്ക്ക് മൂന്ന് വിക്കറ്റുകൾ നഷ്ടമായി. മായങ്ക് യാദവിന്റെ പന്തിൽ ബ്രയാൻ ബെന്നറ്റ് ആദ്യ പന്തിൽ തന്നെ പുറത്തായി. പിന്നാലെ ബെൻ കറൻ, ഡിയോൺ മെയേഴ്സ് എന്നിവരും മടങ്ങി. ക്യാപ്റ്റൻ സിക്കന്ദർ റാസയ്ക്കും മികച്ച പ്രകടനം പുറത്തെടുക്കാനായില്ല.
ബേൾ-മധെവേരെ സഖ്യം 32 റൺസ് കൂട്ടിച്ചേർത്തത് ആതിഥേയർക്ക് ആശ്വാസമായി. മധെവേരെയും മരുമാനിയും ചേർന്ന് 57 റൺസിന്റെ കൂട്ടുകെട്ടുണ്ടാക്കിയതോടെയാണ് സിംബാബ്വെ ഭേദപ്പെട്ട സ്കോറിലെത്തിയത്.
മൂന്ന് മത്സരങ്ങളുള്ള ടി20 പരമ്പരയിലെ ആദ്യ മത്സരത്തിലാണ് ഇരു ടീമുകളും ഏറ്റുമുട്ടുന്നത്. ഇന്ത്യക്കായി പേസർ അശോക് ശർമ്മ ടി20 അരങ്ങേറ്റം കുറിച്ചു. മായങ്ക് യാദവ് ടീമിൽ തിരിച്ചെത്തിയതും ശ്രദ്ധേയമായി.
മൂന്ന് സ്പെഷ്യലിസ്റ്റ് പേസർമാരും ഒരു സ്പിന്നറുമായാണ് ഇന്ത്യ ഇറങ്ങിയത്. പ്രിൻസ് യാദവ്, അശോക് ശർമ്മ, മായങ്ക് യാദവ് എന്നിവരാണ് പേസ് നിരയിൽ. രവി ബിഷ്ണോയ് ഏക സ്പിന്നറാണ്. സഞ്ജു സാംസണിന്റെ അഭാവത്തിൽ വൈഭവ് സൂര്യവംശി ഇന്ത്യയുടെ ഇന്നിങ്സ് ഓപ്പൺ ചെയ്യും. റിങ്കു സിംഗും ടീമിൽ തിരിച്ചെത്തിയിട്ടുണ്ട്.
