ഗാസ: മധ്യ ഗാസയിലെ നുസൈറാത്ത് പ്രദേശത്ത് ഭീകരരെ ലക്ഷ്യമിട്ട് വ്യോമാക്രമണം നടത്തിയതായി ഇസ്രായേൽ സൈന്യം അറിയിച്ചു. ഇസ്രായേൽ സേനയ്ക്കെതിരെ ആസൂത്രിതമായ ആക്രമണം തടയുക എന്നതായിരുന്നു ആക്രമണത്തിന്റെ ലക്ഷ്യമെന്ന് സൈന്യം വ്യക്തമാക്കി.
യുഎസ് പ്രസിഡന്റ് ഡൊണാൾഡ് ട്രംപിന്റെ മധ്യസ്ഥതയിൽ വെടിനിർത്തൽ കരാർ നിലവിലുണ്ടായിരുന്നിട്ടും, ആക്രമണം ഗാസയിൽ ആക്രമണം ശക്തമാവുകയാണ്. വെടിനിർത്തൽ കരാർ പ്രകാരം സതേൺ കമാൻഡിലെ സേനകളെ പ്രദേശത്ത് വിന്യസിച്ചിട്ടുണ്ട്, അടിയന്തര ഭീഷണികളെ ഇല്ലാതാക്കാൻ പ്രവർത്തനം തുടരും, എന്ന് ഐഡിഎഫ് പ്രസ്താവനയിൽ വ്യക്തമാക്കിയിട്ടുണ്ട്.
ആക്രമണത്തെ കുറിച്ച് ഹമാസ് ഇതുവരെ പ്രതികരിച്ചിട്ടില്ല. ദൃക്സാക്ഷികളുടെ മൊഴിപ്രകാരം, ഒരു ഡ്രോൺ ഒരു കാറിൽ ഇടിച്ചുകയറി തീയിടുന്നത് കണ്ടതായി റോയിറ്റേഴ്സ് റിപ്പോർട്ട് ചെയ്തു. നാല് പേർക്ക് പരിക്കേറ്റതായി പ്രാദേശിക ഡോക്ടർമാർ സ്ഥിരീകരിച്ചു. മരണസംഖ്യയെക്കുറിച്ച് വ്യക്തമായ വിവരം ഇതുവരെ ലഭ്യമായിട്ടില്ല. ഗാസ സിറ്റിയുടെ കിഴക്കൻ മേഖലകളിൽ ഇസ്രായേൽ ടാങ്കുകൾ ഷെല്ലാക്രമണം നടത്തിയതായും ദൃക്സാക്ഷികൾ അറിയിച്ചു.
വിദേശ ഉദ്യോഗസ്ഥരെ വിലക്കുന്ന നയത്തിന് വിപരീതമായി, 2023 ഒക്ടോബർ 7 ന് ഇസ്രായേൽ സമൂഹങ്ങൾക്ക് നേരെ ഹമാസ് നടത്തിയ ആക്രമണത്തിൽ ബന്ദികളാക്കപ്പെട്ടവരുടെ മൃതദേഹങ്ങൾ കണ്ടെത്താൻ സഹായിക്കുന്നതിന് ഈജിപ്ഷ്യൻ പ്രതിനിധികളെ ഗാസ മുനമ്പിലേക്ക് ഇസ്രായേൽ അനുവദിച്ചതായി നിരവധി ഇസ്രായേലി മാധ്യമങ്ങൾ റിപ്പോർട്ട് ചെയ്തു.
വെടിനിർത്തൽ കരാറിന്റെ ഭാഗമായി, തട്ടിക്കൊണ്ടുപോയ എല്ലാ ബന്ദികളെയും തിരികെ വിടുമെന്ന് ഹമാസ് പ്രതിജ്ഞ ചെയ്തിട്ടുണ്ട്. എങ്കിലും, 18 പേരുടെ മൃതദേഹങ്ങൾ ഇപ്പോഴും ഗാസയിൽ തന്നെയുണ്ടെന്നാണ് റിപ്പോർട്ടുകൾ.
2023 ഒക്ടോബർ 7-ലെ ആക്രമണത്തിൽ പിടിക്കപ്പെട്ട 20 ഇസ്രായേൽ ബന്ദികളെ ഹമാസ് അടുത്തിടെ മോചിപ്പിച്ചു. മോചിപ്പിച്ചവരെ അന്താരാഷ്ട്ര റെഡ് ക്രോസ് കമ്മിറ്റിക്ക് കൈമാറി, തുടർന്ന് ഇവർ കുടുംബങ്ങളുമായി ഇസ്രായേലിൽ വീണ്ടും ഒന്നിച്ചു.
