ഡൽഹി: കേരളത്തിന്റെ പുതിയ മുഖ്യമന്ത്രിയായി വി.ഡി. സതീശനെ എഐസിസി ഔദ്യോഗികമായി പ്രഖ്യാപിച്ചു. ഡൽഹിയിൽ നടന്ന വാർത്താസമ്മേളനത്തിലാണ് ഹൈക്കമാൻഡ് നിർണ്ണായകമായ ഈ തീരുമാനം അറിയിച്ചത്. പത്തു വർഷത്തെ ഇടവേളയ്ക്ക് ശേഷം ഭരണത്തിലേക്ക് തിരിച്ചെത്തുന്ന യു.ഡി.എഫിനെ ഇനി വി.ഡി. സതീശൻ നയിക്കും. പ്രഖ്യാപനം വന്നതിന് പിന്നാലെ തന്റെ നിലപാട് വ്യക്തമാക്കി കെ.സി. വേണുഗോപാൽ രംഗത്തെത്തി. ഹൈക്കമാൻഡ് തീരുമാനത്തിൽ താൻ പൂർണ്ണ സന്തോഷവാനാണെന്നും പാർട്ടിയുടെ ഐക്യമാണ് പ്രധാനമെന്നും അദ്ദേഹം ഡൽഹിയിൽ മാധ്യമങ്ങളോട് പറഞ്ഞു. മുഖ്യമന്ത്രി സ്ഥാനത്തേക്ക് പരിഗണിക്കപ്പെട്ടിരുന്ന പ്രമുഖ നേതാക്കളിലൊരാളായ വേണുഗോപാലിന്റെ ഈ പ്രതികരണം കോൺഗ്രസിനുള്ളിലെ അനിശ്ചിതാവസ്ഥയ്ക്ക് അറുതി വരുത്തുന്നതാണ്. അതേസമയം, ഔദ്യോഗിക പ്രഖ്യാപനം വന്ന സാഹചര്യത്തിൽ വരും മണിക്കൂറുകളിൽ കൂടുതൽ പ്രതികരണങ്ങൾ നടത്തുമെന്ന് വി.ഡി. സതീശനും വ്യക്തമാക്കിയിട്ടുണ്ട്.
മുഖ്യമന്ത്രി പ്രഖ്യാപനം വന്നതോടെ തിരുവനന്തപുരത്തെ കെപിസിസി ആസ്ഥാനത്തിന് മുന്നിൽ വലിയ തോതിലുള്ള ആഹ്ലാദപ്രകടനങ്ങളാണ് നടക്കുന്നത്. പ്രവർത്തകർ പടക്കം പൊട്ടിച്ചും മധുരം വിതരണം ചെയ്തും വിജയവാർത്ത ആഘോഷമാക്കുകയാണ്. വരും മണിക്കൂറുകളിൽ കൂടുതൽ നേതാക്കളും എംഎൽഎമാരും കെപിസിസി ഓഫീസിലേക്ക് എത്തുമെന്നാണ് റിപ്പോർട്ടുകൾ. ജനഹിതം മാനിച്ചുകൊണ്ടുള്ള ഉചിതമായ തീരുമാനമാണ് ഹൈക്കമാൻഡ് കൈക്കൊണ്ടതെന്ന് പാർട്ടിയിലെ യുവനേതൃത്വം പ്രതികരിച്ചു. കേരളം കേൾക്കാൻ ആഗ്രഹിച്ച പ്രഖ്യാപനമാണ് ഉണ്ടായതെന്നും ജനവികാരത്തെ കണ്ടില്ലെന്ന് നടിക്കാൻ ഒരു ജനാധിപത്യ പ്രസ്ഥാനത്തിന് കഴിയില്ലെന്നും വി.ടി. ബൽറാം തന്റെ സോഷ്യൽ മീഡിയ പോസ്റ്റിലൂടെ വ്യക്തമാക്കി.
അഭൂതപൂർവ്വമായ ജനകീയ പിന്തുണയോടെയാണ് വി.ഡി. സതീശൻ കേരളത്തിന്റെ അമരത്തേക്ക് എത്തുന്നതെന്ന് രാഷ്ട്രീയ നിരീക്ഷകർ വിലയിരുത്തുന്നു. പ്രതിപക്ഷ നേതാവ് എന്ന നിലയിൽ കഴിഞ്ഞ അഞ്ചു വർഷം നടത്തിയ നിരന്തര പോരാട്ടങ്ങൾക്കുള്ള അംഗീകാരമായാണ് ഈ പദവിയെ അണികൾ കാണുന്നത്. കോൺഗ്രസിന്റെയോ യു.ഡി.എഫിന്റെയോ മാത്രം മുഖ്യമന്ത്രിയായല്ല, മറിച്ച് കേരളത്തിലെ മുഴുവൻ ജനങ്ങളുടെയും മുഖ്യമന്ത്രിയായാണ് സതീശൻ ചുമതലയേൽക്കുന്നതെന്ന് നേതൃത്വം അവകാശപ്പെടുന്നു. വമ്പിച്ച ഭൂരിപക്ഷത്തോടെ അധികാരത്തിലെത്തിയ സർക്കാരിന് മുന്നിൽ വലിയ പ്രതീക്ഷകളാണ് ജനങ്ങൾ വെച്ചുപുലർത്തുന്നത്.
ഇനി വരാനിരിക്കുന്നത് ഒറ്റക്കെട്ടായ പ്രവർത്തനങ്ങളുടെ നാളുകളാണെന്ന് പാർട്ടി നേതൃത്വം വ്യക്തമാക്കുന്നു. തിരഞ്ഞെടുപ്പ് കാലത്ത് ജനങ്ങൾക്ക് നൽകിയ വാഗ്ദാനങ്ങൾ പാലിക്കുക എന്ന വലിയ ഉത്തരവാദിത്തമാണ് പുതിയ സർക്കാരിന് മുന്നിലുള്ളത്. ഗ്രൂപ്പ് വൈര്യങ്ങൾ മറന്ന് മുന്നണിയിലെ എല്ലാ കക്ഷികളെയും ഏകോപിപ്പിച്ച് മുന്നോട്ട് പോകുക എന്നത് വി.ഡി. സതീശനെ സംബന്ധിച്ചിടത്തോളം വലിയ വെല്ലുവിളിയാണെങ്കിലും, ഹൈക്കമാൻഡിന്റെ പൂർണ്ണ പിന്തുണയും നേതാക്കളുടെ ഐക്യവും അദ്ദേഹത്തിന് കരുത്തേകും. വരും ദിവസങ്ങളിൽ മന്ത്രിസഭാ രൂപീകരണ ചർച്ചകളിലേക്ക് യു.ഡി.എഫ് കടക്കും. കേരളത്തിന്റെ ഭാവി വികസന സ്വപ്നങ്ങൾക്ക് പുതിയ മുഖ്യമന്ത്രിയുടെ നേതൃത്വത്തിൽ വേഗത കൈവരുമെന്നാണ് അണികളുടെയും വോട്ടർമാരുടെയും പ്രതീക്ഷ
