തിരുവനന്തപുരം: സംസ്ഥാനത്തെ 2027ലെ എസ്എസ്എൽസി, ഹയർ സെക്കൻഡറി, വിഎച്ച്എസ്ഇ പൊതുപരീക്ഷാ തീയതികൾ പ്രഖ്യാപിച്ചു. എസ്എസ്എൽസി പരീക്ഷകൾ മാർച്ച് ഒന്നിന് ആരംഭിക്കും. ഹയർ സെക്കൻഡറി, വിഎച്ച്എസ്ഇ ഒന്നാം വർഷ, രണ്ടാം വർഷ പരീക്ഷകൾ മാർച്ച് രണ്ടിനാണ് തുടങ്ങുന്നത്.

എസ്എസ്എൽസി പരീക്ഷകളുടെ മൂല്യനിർണയം ഏപ്രിൽ അഞ്ചിന് ആരംഭിക്കും. മെയ് ആദ്യവാരം ഫലം പ്രസിദ്ധീകരിക്കാനാണ് തീരുമാനം. ഫെബ്രുവരി 16 മുതൽ 20 വരെയാണ് എസ്എസ്എൽസി മോഡൽ പരീക്ഷകൾ നടക്കുക. ഇത്തവണ 4.25 ലക്ഷം വിദ്യാർഥികളാണ് എസ്എസ്എൽസി പരീക്ഷ എഴുതുന്നത്.

ഹയർ സെക്കൻഡറി, വിഎച്ച്എസ്ഇ പരീക്ഷകൾ മാർച്ച് രണ്ട് മുതൽ 30 വരെ നടക്കും. മെയ് 15ന് ഹയർ സെക്കൻഡറി പരീക്ഷാഫലം പ്രഖ്യാപിക്കും. മാർച്ച് 12, 30 തീയതികളിൽ ഉച്ചയ്ക്ക് രണ്ടിനാണ് പരീക്ഷകൾ ആരംഭിക്കുക. മറ്റ് ദിവസങ്ങളിൽ രാവിലെ 9.30ന് പരീക്ഷ തുടങ്ങുന്ന രീതിയിലാണ് സമയക്രമം തയ്യാറാക്കിയിരിക്കുന്നത്.