തിരുവനന്തപുരം: കേരള രാജ്യാന്തര ചലച്ചിത്രമേളയ്ക്ക് ഇന്ന് സമാപനം. അവസാന ദിനമായ ഇന്ന് 11 ചിത്രങ്ങളാണ് പ്രദര്ശിപ്പിക്കുക.
കേരളത്തിന്റെ അഭിമാനമായ മേളയ്ക്ക് മുപ്പതാം കൊല്ലം നേരിടേണ്ടി വന്നത് അസാധാരണമായ സാഹചര്യങ്ങളാണ്.
ബാറ്റില്ഷിപ്പ് പോട്ടംകിന് അടക്കം 19 സിനിമകള്ക്ക് കേന്ദ്രം സെന്സര് ഇളവ് അനുവദിക്കാതെ വന്നതോടെയാണ് മേള പ്രതിസന്ധിയിലായത്. പിന്നാലെയുയര്ന്നത് കടുത്ത പ്രതിഷേധമായിരുന്നു.
വ്യാപക വിമര്ശനത്തിന് പിന്നാലെ കേന്ദ്രം ആറ് സിനിമകള് ഒഴികെ മറ്റ് ചിത്രങ്ങള്ക്ക് സെന്സര് ഇളവ് നല്കുകയായിരുന്നു.
വിലക്ക് നോക്കാതെ എല്ലാ ചിത്രങ്ങളും പ്രദര്ശിപ്പിക്കുമെന്നായിരുന്നു കേരളം ആദ്യം പ്രഖ്യാപിച്ചത്.
എന്നാല്, കേന്ദ്രം നിലപാട് കടുപ്പിച്ചതോടെ കേരളം പിന്വലിയുകയാണ് ചെയ്തത്. കേന്ദ്രം വിലക്കിയ സിനിമകളുടെ പ്രദര്ശനം ഒടുവില് മാറ്റിവക്കേണ്ടിവന്നു.
അതേസമയം മേളക്കാലത്ത് അക്കാദമി ചെയര്മാന് റസൂല് പൂക്കുട്ടി സ്ഥലത്തില്ലാത്തതും വ്യാപക വിമര്ശനത്തിനിടയാക്കി.
സമാപന സമ്മേളനത്തിനായാണ് ചെയര്മാന് എത്തിയത്. മുഖ്യമന്ത്രിയാണ് സമാപന സമ്മേളനത്തിലെ മുഖ്യാതിഥി. അവസാന ദിനം 11 ചിത്രങ്ങളാണ് പ്രദര്ശിപ്പിക്കുക.
