മലപ്പുറം: സംസ്ഥാനത്തുണ്ടായ യുഡിഎഫ് മുന്നേറ്റത്തിന് പിന്നാലെ പുതിയ സർക്കാരിൽ മന്ത്രിസ്ഥാനം ലഭിച്ചാൽ അത് സന്തോഷപൂർവം സ്വീകരിക്കുമെന്ന് മുസ്ലിം ലീഗ് നേതാവ് കെ.എം ഷാജി. മുഖ്യമന്ത്രി പിണറായി വിജയനെതിരെയും അദ്ദേഹത്തിന്റെ ഭരണശൈലിക്കെതിരെയും കഴിഞ്ഞ കാലങ്ങളിൽ താൻ ഉന്നയിച്ച വിമർശനങ്ങൾ ശരിയായിരുന്നുവെന്ന് കാലം തെളിയിച്ചിരിക്കുകയാണ്. തിരഞ്ഞെടുപ്പ് ഫലത്തിൽ പ്രതിഫലിച്ചത് കടുത്ത സർക്കാർ വിരുദ്ധതയും പിണറായി വിരുദ്ധതയുമാണെന്നും പ്രതികരിച്ചു. യുഡിഎഫിന് ഇത്തവണ ലഭിച്ചത് മുന്നണിയുടെ മാത്രം വോട്ടുകളല്ല, മറിച്ച് സർക്കാരിനോടുള്ള പ്രതിഷേധം രേഖപ്പെടുത്തിയ പൊതുജനങ്ങളുടെ വോട്ടുകൾ കൂടിയാണ്. ജനങ്ങൾ നൽകിയ ഈ വലിയ വിശ്വാസത്തിനനുസരിച്ച് ഉയരാൻ യുഡിഎഫിന് കഴിഞ്ഞില്ലെങ്കിൽ ഭാവിയിൽ മുന്നണിക്കും തിരിച്ചടി നേരിടേണ്ടി വരുമെന്ന മുന്നറിയിപ്പും ഷാജി നൽകി.
വേങ്ങര മണ്ഡലത്തിലെ തന്റെ പ്രകടനത്തെക്കുറിച്ചും അദ്ദേഹം തുറന്നുപറഞ്ഞു. മുൻപ് വിവിധ വിഷയങ്ങളിൽ താൻ സ്വീകരിച്ച ചില കർക്കശമായ നിലപാടുകൾ വേങ്ങരയിൽ തനിക്ക് നേരിയ രീതിയിൽ പ്രതികൂലമായി ബാധിച്ചിട്ടുണ്ടെന്നും അദ്ദേഹം സമ്മതിച്ചു. എങ്കിലും സംസ്ഥാനവ്യാപകമായി ഉണ്ടായ രാഷ്ട്രീയ മാറ്റം യുഡിഎഫിന് വലിയ കരുത്താണ് നൽകിയിരിക്കുന്നത്. സർക്കാരിന്റെ വീഴ്ചകളും മുഖ്യമന്ത്രിയുടെ ഏകാധിപത്യപരമായ സമീപനങ്ങളും ജനങ്ങൾ തള്ളിക്കളഞ്ഞതിന്റെ തെളിവാണ് ഈ വോട്ട് വിഹിതമെന്നും, അഴിമതിക്കും സ്വജനപക്ഷപാതത്തിനുമെതിരായ പോരാട്ടം തുടരുമെന്നും അദ്ദേഹം വ്യക്തമാക്കി. വരാനിരിക്കുന്ന മന്ത്രിസഭാ രൂപീകരണ ചർച്ചകളിൽ പാർട്ടിയുടെ തീരുമാനത്തിനൊപ്പം നിൽക്കുമെന്നും ലഭിക്കുന്ന ഉത്തരവാദിത്തങ്ങൾ ആത്മാർത്ഥമായി നിറവേറ്റുമെന്നും കെ.എം ഷാജി കൂട്ടിച്ചേർത്തു.
