കൊച്ചി: ഇന്ത്യൻ ബാങ്കിന്റെ എറണാകുളം എം.ജി. റോഡ് ശാഖയിൽ വൻ തട്ടിപ്പ് നടന്നതായി പരാതി. ബാങ്കിന്റെ ഡയറക്ട് സെല്ലിംഗ് ഏജന്റായ മൈമോ ഫിനാൻഷ്യൽ സർവീസ് എന്ന കമ്പനിയാണ് 29 കോടി രൂപയുടെ തട്ടിപ്പ് നടത്തിയതെന്നാണ് ആരോപണം.

എൻആർഐ ഹൗസിംഗ് ലോൺ വഴിയാണ് തട്ടിപ്പ് നടത്തിയതെന്നാണ് കണ്ടെത്തൽ. റിയാദിലെ ഇന്ത്യൻ കോൺസുലേറ്റിന്റെയും മസ്കറ്റ് എംബസിയുടെയും പേരിൽ വ്യാജ അറ്റസ്റ്റേഷൻ രേഖകൾ കമ്പനി തയ്യാറാക്കിയതായും അന്വേഷണത്തിൽ കണ്ടെത്തിയിട്ടുണ്ട്.

വ്യാജ രേഖകൾ ഉപയോഗിച്ച് ലോൺ നേടിയെടുത്താണ് തട്ടിപ്പ് നടത്തിയതെന്നാണ് കേസ്. സംഭവത്തിൽ മൈമോ ഫിനാൻഷ്യൽ സർവീസിന്റെ ഡയറക്ടർമാർ, ലോൺ നേടിയവർ എന്നിവരുൾപ്പെടെ 27 പേർക്കെതിരെ നിലവിൽ കേസെടുത്തിട്ടുണ്ട്. തട്ടിപ്പുമായി ബന്ധപ്പെട്ട കൂടുതൽ വിവരങ്ങൾ കണ്ടെത്തുന്നതിനായി അന്വേഷണം തുടരുകയാണ്.