തിരുവനന്തപുരം: കെഎസ്ആര്ടിസിയുടെ ബജറ്റ് ടൂറിസം പദ്ധതിക്ക് മികച്ച പ്രതികരണമാണ് ലഭിക്കുന്നതെന്ന് മന്ത്രി കെ ബി ഗണേഷ് കുമാര്. ബജറ്റ് ടൂറിസത്തില് വലിയ തോതിലുള്ള വര്ധനവാണ് വന്നിരിക്കുന്നതെന്നും മന്ത്രി ഗണേഷ് കുമാര് നിയമസഭയില് പറഞ്ഞു. 2021, 2022, 2023 വരെ ഒരു കോടി മുതല് ഒന്നേകാല് കോടി വരെയാണ് കിട്ടിയിരുന്നത്. എന്നാല് കഴിഞ്ഞ മാസം ബജറ്റ് ടൂറിസം വഴി കെഎസ്ആര്ടിസിക്ക് ലഭിച്ചത് നാലരക്കോടി രൂപയാണ്. ഈ മാസം ലഭിച്ചത് അഞ്ചര കോടി രൂപയാണെന്നും ഗതാഗതമന്ത്രി കെ ബി ഗണേഷ് കുമാര് നിയമസഭയെ അറിയിച്ചു.
കെഎസ്ആര്ടിസി മാറുകയാണ്. മാറുന്നതിന് അനുസരിച്ചിട്ടുള്ള ലാഭവും കെഎസ്ആര്ടിസി കൈവരിക്കുന്നുണ്ട്. ജനുവരി മാസത്തില് ലഭിച്ച അഞ്ചരക്കോടി രൂപയില് 65 ലക്ഷം രൂപ ലാഭമാണെന്നും മന്ത്രി പറഞ്ഞു. ഇങ്ങനെ വരുമാനത്തിൽ വലിയ വര്ധനവ് ഉണ്ടാകുന്നുണ്ട്. പരസ്യങ്ങളിലൂടെയും വരുമാനം ലഭിക്കുന്നുണ്ട്. ബസിന് പുറത്തെ പരസ്യം കേസും വഴക്കുമായി കിടക്കുകയാണ്. അതു കൊടുത്തു കഴിഞ്ഞാല് കോടിക്കണക്കിന് രൂപ ആ ഇനത്തിലും ലഭിക്കുമെന്ന് ഗതാഗതമന്ത്രി പറഞ്ഞു.
