പത്തനംതിട്ട: സിഎംആർഎൽ–എക്സാലോജിക് കേസിൽ അഡ്വക്കേറ്റ് ജനറലിന്റെ നിയമോപദേശം ലഭിച്ചതായി ആഭ്യന്തരമന്ത്രി രമേശ് ചെന്നിത്തല. ആഭ്യന്തര വകുപ്പ് വിഷയം പരിശോധിച്ചുവരികയാണെന്നും മുഖ്യമന്ത്രിയുമായി ആലോചിച്ച ശേഷം തുടർനടപടികളിൽ തീരുമാനമെടുക്കുമെന്നും അദ്ദേഹം പറഞ്ഞു.
അഡ്വക്കേറ്റ് ജനറലിന്റെ നിയമോപദേശം താൻ ഇതുവരെ കണ്ടിട്ടില്ലെന്നും തിങ്കളാഴ്ചയോ ചൊവ്വാഴ്ചയോ മേൽനടപടികളിൽ തീരുമാനമുണ്ടാകുമെന്നും ചെന്നിത്തല വ്യക്തമാക്കി. വിഷയം രാഹുൽ ഗാന്ധിയുമായി ചർച്ച ചെയ്യേണ്ട സാഹചര്യമില്ലെന്നും തീരുമാനം സംസ്ഥാനത്ത് തന്നെ എടുക്കേണ്ടതാണെന്നും അദ്ദേഹം പറഞ്ഞു.
മാധ്യമ സ്ഥാപനങ്ങളുമായി സർക്കാരിന് പ്രശ്നങ്ങളില്ലെന്നും മാധ്യമങ്ങളുമായി നല്ല ബന്ധമാണുള്ളതെന്നും ചെന്നിത്തല പറഞ്ഞു. നിയമം നിയമത്തിന്റെ വഴിക്ക് പോകുമെന്നും എസ്ഐടി സ്വതന്ത്രമായി പ്രവർത്തിക്കുമെന്നും അന്വേഷണത്തിൽ മന്ത്രിയോ സർക്കാരോ ഇടപെടില്ലെന്നും അദ്ദേഹം വ്യക്തമാക്കി.
അടൂരിൽ പട്ടികജാതി യുവാവിനെ പൊലീസ് മർദിച്ചെന്ന പരാതിയിലും അന്വേഷണം നടക്കുന്നതായി മന്ത്രി അറിയിച്ചു. ജില്ലാ ക്രൈംബ്രാഞ്ച് അന്വേഷണം നടത്തി ഐജിക്ക് റിപ്പോർട്ട് നൽകിയിട്ടുണ്ടെന്നും പൊലീസിന്റെ ഭാഗത്ത് വീഴ്ച കണ്ടെത്തിയാൽ ശക്തമായ നടപടി സ്വീകരിക്കുമെന്നും അദ്ദേഹം പറഞ്ഞു.
അതേസമയം, പിണറായി വിജയനും മുഹമ്മദ് റിയാസിനുമെതിരായ അന്വേഷണത്തിൽ മുഖ്യമന്ത്രിയുമായി ആലോചിച്ച് തീരുമാനമെടുക്കുമെന്ന് കെ. മുരളീധരനും പ്രതികരിച്ചു. തിരഞ്ഞെടുപ്പ് സംഭാവനയും കൈക്കൂലിയും തമ്മിൽ വ്യത്യാസമുണ്ടെന്നും, ചെയ്യാത്ത സേവനത്തിന് മുഖ്യമന്ത്രിയുടെ പേര് പറഞ്ഞ് പണം വാങ്ങുന്നത് അഴിമതിയാണെന്നും മുരളീധരൻ ആരോപിച്ചു. റിയാസിനെതിരെ രാഷ്ട്രീയ പരിഹാസവും അദ്ദേഹം ഉന്നയിച്ചു.
