കുവൈത്ത് സിറ്റി: കുവൈത്തിൽ വൻ മയക്കുമരുന്ന് ശേഖരം പിടികൂടി. ഏകദേശം ഏഴ് ലക്ഷം ക്യാപ്റ്റഗൺ ഗുളികകളുമായി ഇറാഖ് പൗരനെയും ബിദൂനി യുവാവിനെയും കുവൈത്ത് മയക്കുമരുന്ന് വിരുദ്ധ വിഭാഗം അറസ്റ്റ് ചെയ്തു.
കുവൈത്തും ഇറാഖും തമ്മിലുള്ള സുരക്ഷാ സഹകരണത്തിന്റെ ഭാഗമായി നടത്തിയ സംയുക്ത നടപടിയിലാണ് മയക്കുമരുന്ന് പിടികൂടിയത്. കബ്ദ് മേഖലയിലെ കന്നുകാലി വളർത്തൽ കേന്ദ്രങ്ങളിൽ നടത്തിയ പരിശോധനയ്ക്കിടെയാണ് ഇരുവരും പിടിയിലായത്. തെളിവുകൾ സഹിതം ചോദ്യം ചെയ്തപ്പോൾ പിടികൂടിയ ഗുളികകൾ തങ്ങളുടേതാണെന്നും വിൽപ്പനയ്ക്കായി സൂക്ഷിച്ചതാണെന്നും പ്രതികൾ സമ്മതിച്ചതായി അധികൃതർ അറിയിച്ചു.
തുടർ നിയമനടപടികൾക്കായി പ്രതികളെ ബന്ധപ്പെട്ട അധികൃതർക്ക് കൈമാറി. അന്താരാഷ്ട്ര സുരക്ഷാ സഹകരണത്തിലൂടെ മയക്കുമരുന്ന് കടത്ത് ശൃംഖലകൾ കണ്ടെത്താനും രാജ്യത്തേക്ക് മയക്കുമരുന്ന് എത്തുന്നത് തടയാനും നടപടികൾ ശക്തമാക്കുമെന്ന് കുവൈത്ത് ആഭ്യന്തര മന്ത്രാലയം അറിയിച്ചു.
