മലപ്പുറം: നിയമസഭാ തെരഞ്ഞെടുപ്പിലെ തിരിച്ചടി മലപ്പുറം സിപിഎം ജില്ലാ കമ്മിറ്റിയിൽ വിശദമായി ചർച്ചയാകും. പാർട്ടിയുടെ സ്വാധീനമേഖലയായ പൊന്നാനി ഉൾപ്പെടെയുള്ള മണ്ഡലങ്ങളിൽ നേരിട്ട പരാജയവും യോഗത്തിൽ പ്രധാന വിഷയമാകും.
പൊന്നാനിയിൽ പ്രാദേശിക തലത്തിൽ അഭിപ്രായ വ്യത്യാസങ്ങൾ രൂക്ഷമാണെന്നാണ് പ്രവർത്തകരുടെ വിലയിരുത്തൽ. സ്ഥാനാർഥി നിർണയത്തിലും നേതൃത്വത്തിന്റെ തീരുമാനങ്ങളിലും താഴെത്തട്ടിൽ നിന്ന് വിമർശനം ഉയർന്നിട്ടുണ്ട്. മന്ത്രിയായിരുന്ന വി. അബ്ദുറഹ്മാൻ മണ്ഡലം മാറി മത്സരിച്ചതും പ്രവർത്തകർ ചർച്ച ചെയ്യുന്ന വിഷയമാണ്.
‘മെസ്സി’യുടെ പേരുമായി ബന്ധപ്പെട്ട് ഉയർന്ന തട്ടിപ്പ് ആരോപണവും വിപുലീകൃത ജില്ലാ കമ്മിറ്റി യോഗത്തിൽ ഉന്നയിക്കുമോ എന്നതും ശ്രദ്ധേയമാണ്. ന്യൂനപക്ഷ വിഭാഗങ്ങൾക്കിടയിൽ പാർട്ടിക്ക് വിശ്വാസം നഷ്ടപ്പെട്ടതായി സിപിഎം നേരത്തെ വിലയിരുത്തിയിരുന്നു. ഈ വിശ്വാസം വീണ്ടെടുക്കുന്നതിനുള്ള നടപടികളും ജില്ലാ കമ്മിറ്റി ചർച്ച ചെയ്യും.
വെള്ളാപ്പള്ളി നടേശന്റെ പ്രസ്താവനയുമായി ബന്ധപ്പെട്ട് ആലപ്പുഴയിലെ വിപുലീകൃത ജില്ലാ കമ്മിറ്റി ഉദ്ഘാടനത്തിൽ മുഖ്യമന്ത്രി പിണറായി വിജയൻ സ്വീകരിച്ച നിലപാടും മലപ്പുറത്ത് ചർച്ചയാകും. അതേസമയം, പാർട്ടി അംഗത്വം സ്വീകരിച്ച മുൻ മന്ത്രി കെ.ടി. ജലീൽ ജില്ലാ കമ്മിറ്റിയിൽ എത്തിയേക്കുമെന്നാണ് സൂചന. മുൻ മന്ത്രി വി. അബ്ദുറഹ്മാനും ജില്ലാ കമ്മിറ്റിയിലേക്ക് വരുമെന്നാണ് വിവരം.
വിപുലീകൃത ജില്ലാ കമ്മിറ്റി യോഗം പിണറായി വിജയൻ ഉദ്ഘാടനം ചെയ്തു. പാർട്ടിയെ എഴുതിത്തള്ളാനാകില്ലെന്ന് ഉപതെരഞ്ഞെടുപ്പ് ഫലങ്ങൾ വ്യക്തമാക്കുന്നതായി അദ്ദേഹം പറഞ്ഞു. നിയമസഭാ തെരഞ്ഞെടുപ്പിലെ പരാജയത്തിന്റെ യാഥാർഥ്യ വസ്തുതകൾ വിശദമായി പരിശോധിച്ചുവരികയാണെന്നും പിണറായി വ്യക്തമാക്കി.
