മലപ്പുറം: പിരിഞ്ഞുതാമസിക്കുന്ന ഭാര്യയെ വീട്ടിലെത്തി മർദിക്കുകയും കത്തി ഉപയോഗിച്ച് വെട്ടിപ്പരിക്കേൽപ്പിക്കുകയും ചെയ്ത കേസിൽ യുവാവ് അറസ്റ്റിൽ. ശാന്തിഗ്രാം പടിയറ പുതുപ്പറമ്പിൽ രാധാകൃഷ്ണൻ എന്ന ബിജു (46)വിനെയാണ് പോത്തുകൽ പൊലീസ് അറസ്റ്റ് ചെയ്തത്. ആക്രമണത്തിൽ ഭാര്യ വിനിത (40)യ്ക്ക് ഗുരുതരമായി പരിക്കേറ്റു.

ബുധനാഴ്ച വൈകിട്ട് ആറുമണിയോടെയാണ് സംഭവം. ബിജുവും വിനിതയും കുറച്ചുകാലമായി പിരിഞ്ഞാണ് താമസിച്ചിരുന്നത്. ബുധനാഴ്ച വൈകിട്ട് ബിജു വിനിതയുടെ വീട്ടിലെത്തുകയായിരുന്നു. അടുക്കളയിൽ ജോലി ചെയ്യുകയായിരുന്ന വിനിതയുമായി ബിജു തർക്കത്തിലേർപ്പെട്ടു. തുടർന്ന് വിനിതയെ മർദിക്കുകയും കത്തി ഉപയോഗിച്ച് മുഖത്തും വലത് തോളിലും വെട്ടുകയുമായിരുന്നു. ഗുരുതരമായി പരിക്കേറ്റ വിനിതയെ കോഴിക്കോട് മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. സംഭവത്തെ തുടർന്ന് വീട്ടുകാരും നാട്ടുകാരും പൊലീസിനെ വിവരമറിയിച്ചു.

പോത്തുകൽ പൊലീസ് സ്ഥലത്തെത്തി അന്വേഷണം നടത്തി. വിനിതയുടെ പരാതിയുടെ അടിസ്ഥാനത്തിൽ കേസെടുത്ത പൊലീസ് ബിജുവിനെ കസ്റ്റഡിയിലെടുത്ത് അറസ്റ്റ് രേഖപ്പെടുത്തി. ആക്രമണത്തിന് ഉപയോഗിച്ച കത്തിയും സംഭവത്തിന്റെ സാഹചര്യങ്ങളും സംബന്ധിച്ച് പൊലീസ് അന്വേഷണം തുടരുകയാണ്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.