ബെംഗളൂരു: കന്നഡ നടി കൃഷി തപന്ദയുടെ ബെംഗളൂരുവിലെ ആർആർ നഗറിലുള്ള ഫ്ലാറ്റിൽ 33 വയസ്സുകാരനെ മരിച്ച നിലയിൽ കണ്ടെത്തി. വൈശാഖ് എന്ന യുവാവാണ് മരിച്ചത്. ബുധനാഴ്ച രാത്രിയാണ് വൈശാഖ് ഫ്ലാറ്റിലെത്തിയത്. നടി വീട്ടിലില്ലാത്ത സമയത്ത് ഇയാൾ സീലിങ് ഫാനിൽ തൂങ്ങി മരിച്ചിരിക്കാമെന്നാണ് പൊലീസിന്റെ പ്രാഥമിക നിഗമനം.

സംഭവം നടന്ന ഉടൻ ആർആർ നഗർ പൊലീസ് സ്ഥലത്തെത്തി പരിശോധന നടത്തി. ഫോറൻസിക് സംഘവും തെളിവുകൾ ശേഖരിച്ചു. മൃതദേഹം വിക്ടോറിയ ആശുപത്രിയിലേക്ക് പോസ്റ്റ്മോർട്ടത്തിനായി മാറ്റി.

പോസ്റ്റ്മോർട്ടം റിപ്പോർട്ട് ലഭിച്ച ശേഷമേ മരണകാരണം സ്ഥിരീകരിക്കാൻ കഴിയൂവെന്ന് പൊലീസ് അറിയിച്ചു. സംഭവത്തിൽ നടിയെയും മരിച്ച യുവാവിന്റെ കുടുംബാംഗങ്ങളെയും ചോദ്യം ചെയ്യുമെന്ന് അന്വേഷണ സംഘം വ്യക്തമാക്കി. വൈശാഖ് ഭാര്യയുമായി ഉണ്ടായ തർക്കത്തെ തുടർന്ന് കൃഷി തപന്ദയുടെ ഫ്ലാറ്റിൽ താമസിച്ചിരുന്നുവെന്നും പൊലീസ് പറഞ്ഞു. ഇയാളുടെ മുൻകാല ക്രിമിനൽ പശ്ചാത്തലവും പൊലീസ് പരിശോധിക്കുന്നുണ്ട്.