ദുബായ്: പശ്ചിമേഷ്യയിൽ യുദ്ധം രൂക്ഷമാകുന്നതിനിടെ ഇറാന്റെ ഇസ്ലാമിക് റെവല്യൂഷണറി ഗാർഡ് കോർപ്സ് (IRGC) വക്താവ് ജനറൽ അലി മുഹമ്മദ് നൈനി കൊല്ലപ്പെട്ടതായി റിപ്പോർട്ട്. ഇന്ന് പുലർച്ചെ അമേരിക്കയും ഇസ്രായേലും ചേർന്ന് നടത്തിയ വ്യോമാക്രമണത്തിലാണ് അദ്ദേഹം മരിച്ചതെന്നാണ് ഇറാൻ ഔദ്യോഗിക ടെലിവിഷൻ അറിയിച്ചത്.
ഇറാനിൽ പേർഷ്യൻ പുതുവർഷമായ നൗറൂസ് ആഘോഷിക്കുന്നതിനിടെയാണ് ആക്രമണം നടന്നത്. മരണത്തിന് തൊട്ടുമുമ്പ് ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവിനെതിരെ നൈനി കടുത്ത പ്രസ്താവന നടത്തിയിരുന്നു.
ഇസ്രായേൽ ഇറാന്റെ മിസൈൽ ശേഷി തകർത്തുവെന്ന അവകാശവാദം നൈനി തള്ളിക്കളഞ്ഞിരുന്നു. ഇറാൻ ഇപ്പോഴും ശക്തമായി മിസൈലുകൾ നിർമ്മിക്കുന്നുണ്ടെന്നും അദ്ദേഹം പറഞ്ഞിരുന്നു. അമേരിക്കൻ കപ്പലുകളെ പേർഷ്യൻ ഗൾഫിലേക്ക് അയക്കാൻ ധൈര്യമുണ്ടോ എന്ന് ഡൊണാൾഡ് ട്രംപിനെ വെല്ലുവിളിച്ച ശേഷമാണ് ആക്രമണം ഉണ്ടായത്.
ഫെബ്രുവരി 28-ന് യുദ്ധം ആരംഭിച്ചതിന് ശേഷം ഇറാനിലെ നിരവധി ഉന്നത ഉദ്യോഗസ്ഥർ കൊല്ലപ്പെട്ടിട്ടുണ്ട്. രഹസ്യാന്വേഷണ മന്ത്രി ഇസ്മായിൽ ഖത്തീബ്, സുരക്ഷാ ഉദ്യോഗസ്ഥൻ അലി ലാരിജാനി, ബാസിജ് സേനാ തലവൻ ജനറൽ ഗുലാം റെസ സുലൈമാനി എന്നിവരും മുൻപ് കൊല്ലപ്പെട്ടവരിൽ ഉൾപ്പെടുന്നു.
നൈനിയുടെ മരണത്തെ ഇറാൻ “അമേരിക്കൻ-സയണിസ്റ്റ് ആക്രമണം” എന്ന് വിശേഷിപ്പിച്ചു. ഇതിന് ശക്തമായ തിരിച്ചടി നൽകുമെന്നും മുന്നറിയിപ്പ് നൽകി. ഇതിനിടെ ഇറാൻ നടത്തിയ പ്രത്യാക്രമണങ്ങൾ ഖത്തറിലെ എൽഎൻജി കയറ്റുമതിക്കും കുവൈറ്റിലെ എണ്ണ ശുദ്ധീകരണശാലകൾക്കും ബാധകമായതായി റിപ്പോർട്ടുണ്ട്. ഇത് ആഗോള സമ്പദ്വ്യവസ്ഥയെ ബാധിച്ചിരിക്കുകയാണ്. മേഖലയിൽ സംഘർഷം കൂടുതൽ രാജ്യങ്ങളിലേക്ക് വ്യാപിക്കാനുള്ള ആശങ്കയും ഉയരുന്നു.
