പത്തനാപുരം : മദ്രസകൾ നിർത്തലാക്കമെന്നും മദ്രസ ബോർഡുകൾക്ക് സഹായം നൽകരുതെന്നുമുളള ദേശീയ ബാലാവകാശ കമ്മീഷൻറെ നിർദ്ദേശത്തിന് പിന്നാലെ ചര്ച്ചകൾ സജീവമാകുകയാണ്. മദ്റസകൾ അടച്ചുപൂട്ടുന്നത് അപകടകരമാണെന്ന് മന്ത്രി കെ.ബി. ഗണേഷ്കുമാര് പറഞ്ഞു. പത്തനാപുരത്ത് ഓർത്തഡോക്സ് ക്രൈസ്തവ യുവജനപ്രസ്ഥാനം രാജ്യാന്തര സമ്മേളനത്തിന്റെ സമാപന സമ്മേളനത്തില് സംസാരിക്കുകയായിരുന്നു മന്ത്രി. മതപഠനക്ലാസുകള് അല്ല, വേണ്ടത് ആത്മീയഗ്രന്ഥങ്ങളുടെ പഠനമാണ്.
സൺഡേ സ്കൂളിൽ പഠിപ്പിക്കുന്നത് ക്രിസ്തുമതം അല്ല, ബൈബിളാണ്. മതങ്ങളെ ഭിന്നിപ്പിച്ചുകാണാനല്ല മദ്റസകളിൽ പഠിപ്പിക്കുന്നത്. ചെറിയ കുഞ്ഞുങ്ങൾക്ക് ഖുര്ആന്റെ അറിവ് നൽകുന്നതാണ് മദ്റസകൾ. എല്ലാ വിഭാഗങ്ങളും മതപഠന ക്ലാസ് എന്ന പേരുമാറ്റി ആത്മീയ പഠന ക്ലാസ് എന്നാക്കണമെന്നും അദ്ദേഹം പറഞ്ഞു.
