ന്യൂഡല്ഹി: റേഷന് കാര്ഡ് ഉടമകള്ക്ക് ഓണക്കാലത്തു കൂടുതല് അരി അനുവദിക്കണമെന്ന ആവശ്യം കേന്ദ്രം തള്ളി. എപിഎല്, ബിപിഎല് വ്യത്യാസമില്ലാതെ ഒരു കാര്ഡിന് 5 കിലോഗ്രാം അരി അധികമായി നല്കണമെന്നായിരുന്നു കേരളത്തിന്റെ ആവശ്യം. എന്നാല് നിലവിലുള്ള സംവിധാനത്തില് മാറ്റംവരുത്തി, കേരളത്തിന്റെ ആവശ്യം മാത്രമായി പ്രത്യേകം പരിഗണിക്കാനാകില്ലെന്നു കേന്ദ്രമറിയിക്കുകയായിരുന്നു. ഭക്ഷ്യമന്ത്രി പ്രഹ്ലാദ് ജോഷിയുമായുള്ള കൂടിക്കാഴ്ചയ്ക്കു ശേഷം മന്ത്രി ജി.ആര്.അനില് പറഞ്ഞു. മുന്പുണ്ടായിരുന്ന ഗോതമ്പ് വിഹിതം പുനഃസ്ഥാപിക്കണമെന്ന ആവശ്യവും കേന്ദ്രം പരിഗണിച്ചില്ല.
അതേസമയം, ഒക്ടോബറില് നടക്കുന്ന സംസ്ഥാന പൊതുഭരണവകുപ്പിന്റെ 60ാം വാര്ഷികാഘോഷത്തില് പങ്കെടുക്കാമെന്ന് പ്രഹ്ലാദ് ജോഷി ഉറപ്പുനല്കി.കേന്ദ്രത്തില്നിന്നു കൂടിയ വിലയ്ക്ക് അരിവാങ്ങുന്ന കാര്യം സര്ക്കാര് ആലോചിച്ചു തീരുമാനിക്കും. ഓണവിപണിയില് അരിവില പിടിച്ചുനിര്ത്തുന്നതിനുള്ള നടപടിയെടുക്കുമെന്നും മന്ത്രി പറഞ്ഞു. റേഷന് കടകളിലെ ഇപോസ് മെഷീന്റെ സാങ്കേതിക നവീകരണത്തിനുള്ള സമയപരിധി നീട്ടിനല്കണമെന്ന ആവശ്യം കേന്ദ്രം അംഗീകരിച്ചു. കേരളത്തിനനുവദിച്ച 5676 കിലോലീറ്റര് മണ്ണെണ്ണ ഏറ്റെടുക്കുന്നതിനുള്ള സമയപരിധി ജൂണ് 30ന് അവസാനിച്ചിരുന്നു. ഇത് സെപ്റ്റംബര് 30 വരെ നീട്ടിനല്കണമെന്ന ആവശ്യം കേന്ദ്ര പെട്രോളിയം മന്ത്രി അംഗീകരിച്ചെന്നും മന്ത്രി പറഞ്ഞു.
