കൊച്ചി: മുണ്ടംവേലി ലൈഫ് മിഷൻ ഫ്ളാറ്റ് സമുച്ചയവുമായി ബന്ധപ്പെട്ട് ഉയർന്ന ആരോപണങ്ങൾ ഗൗരവമുള്ളതാണെന്ന് സിപിഐ ജില്ലാ സെക്രട്ടറി എൻ. അരുൺ. ഫ്ളാറ്റ് നിർമാണത്തിൽ പിഴവുണ്ടായെന്നും നിർമാണം നടക്കുന്ന ഘട്ടത്തിൽ തന്നെ അപാകതകൾ ചൂണ്ടിക്കാട്ടിയിരുന്നെന്നും അദ്ദേഹം പറഞ്ഞു.
ഫ്ളാറ്റിലെ നിലവിലെ സാഹചര്യം മനുഷ്യർക്ക് താമസിക്കാൻ കഴിയാത്ത തരത്തിലുള്ളതാണെന്നും പ്രശ്നത്തിന് അടിയന്തര പരിഹാരം വേണമെന്നും എൻ. അരുൺ വ്യക്തമാക്കി. ഫ്ളാറ്റ് നിവാസികൾ നടത്തുന്ന സമരത്തിന് സിപിഐ പിന്തുണ നൽകുമെന്നും അദ്ദേഹം പറഞ്ഞു.
ഫ്ളാറ്റ് നിവാസികളെക്കുറിച്ച് മുൻ എംഎൽഎ കെ.ജെ. മാക്സി നടത്തിയ പരാമർശം അനുചിതമാണെന്നും ഒരു പൊതുപ്രവർത്തകന് ചേരാത്തതാണെന്നും എൻ. അരുൺ വിമർശിച്ചു. മാക്സിയുടെ പരാമർശത്തെ പാർട്ടി തന്നെ തള്ളിക്കളഞ്ഞതായും അദ്ദേഹം വ്യക്തമാക്കി.
ഫ്ളാറ്റ് നിവാസികൾക്കായി സർക്കാർ അടിയന്തരമായി പുനരധിവാസ പാക്കേജ് പ്രഖ്യാപിക്കണമെന്നും നിർമാണത്തിലെ അപാകതകൾക്ക് ഉത്തരവാദികളായവർക്കെതിരെ നടപടി സ്വീകരിക്കണമെന്നും സിപിഐ ആവശ്യപ്പെട്ടു.
മുണ്ടംവേലി ഫ്ളാറ്റ് സമുച്ചയം പൊളിച്ചുനീക്കണമെന്ന മുഖ്യമന്ത്രി വി.ഡി. സതീശന്റെ നിലപാടിനെക്കുറിച്ചുള്ള പ്രതികരണത്തിനിടെയാണ് കെ.ജെ. മാക്സിയുടെ പരാമർശം വിവാദമായത്. ഫ്ളാറ്റ് നിർമാണം അറ്റകുറ്റപ്പണികളിലൂടെ പരിഹരിക്കാവുന്നതാണെന്നും പൊളിച്ചുനീക്കണമെന്ന ആവശ്യം രാഷ്ട്രീയ പ്രേരിതമാണെന്നുമായിരുന്നു മാക്സിയുടെ പ്രതികരണം.
മാക്സിയുടെ പരാമർശത്തിനെതിരെ ഫ്ളാറ്റ് നിവാസികളും കോൺഗ്രസ് നേതാക്കളും രംഗത്തെത്തിയിരുന്നു. പരാമർശം പിൻവലിച്ച് മാക്സി മാപ്പ് പറയണമെന്നായിരുന്നു നിവാസികളുടെ ആവശ്യം. പിന്നീട് പ്രതികരണം പിൻവലിക്കുന്നതായി മാക്സി വ്യക്തമാക്കിയെങ്കിലും മാപ്പ് പറയണമെന്ന ആവശ്യത്തിൽ ഫ്ളാറ്റ് നിവാസികൾ ഉറച്ചുനിൽക്കുകയാണ്.
