മലപ്പുറം: നിലമ്പൂര് ഉപതിരഞ്ഞെടുപ്പിലെ എന്ഡിഎ സ്ഥാനാര്ത്ഥി അഡ്വ. മോഹന് ജോര്ജ് നാമനിര്ദേശ പത്രിക സമര്പ്പിച്ചു. ബിജെപി സംസ്ഥാന അധ്യക്ഷന് രാജീവ് ചന്ദ്രശേഖര്, ശോഭാ സുരേന്ദ്രന്, പി കെ കൃഷ്ണദാസ്, ബിഡിജെഎസ് നേതാവ് തുഷാര് വെള്ളാപ്പള്ളി ഉള്പ്പെടെയുള്ള നേതാക്കള്ക്കൊപ്പം എത്തിയാണ് മോഹന് ജോര്ജ് നാമനിര്ദേശ പത്രിക സമര്പ്പിച്ചത്.
വികസിത കേരളം, വികസിത നിലമ്പൂര് എന്ന ആശയം മുന്നോട്ട് വെച്ചായിരിക്കും നിലമ്പൂരില് തിരഞ്ഞെടുപ്പിനെ നേരിടുകയെന്ന് ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ പ്രതികരിച്ചു. അതേസമയം കഴിവും വിദ്യാഭ്യാസവുമുള്ളയാളാണ് ബിജെപി സ്ഥാനാര്ത്ഥിയെന്നും രാജീവ് പറഞ്ഞു.
നിലമ്പൂര് കോടതിയില് അഭിഭാഷകനായി പ്രവര്ത്തിച്ചുവരുന്നയാളാണ് അഡ്വ. മോഹന് ജോര്ജ്. കേരള കോണ്ഗ്രസ് ജോസഫ് വിഭാഗം നേതാവായിരുന്ന മോഹന് ജോര്ജ് കേരള കോണ്ഗ്രസിന്റെ സംസ്ഥാന സെക്രട്ടറിയുമായിരുന്നു. കേരള കോണ്ഗ്രസിന്റെ വിദ്യാര്ത്ഥി വിഭാഗത്തിന്റെയും യുവജന വിഭാഗത്തിന്റെയും സംസ്ഥാന നേതൃനിരയിലും മോഹന് ജോര്ജ് പ്രവര്ത്തിച്ചിട്ടുണ്ട്. മാര്ത്തോമ സഭ കൗണ്സില് അംഗം, മാര്ത്തോമ കോളേജ് കൗണ്സില് അംഗം, ചുങ്കത്തറ മാര്ത്തോമ ചര്ച്ച് ഉപാധ്യക്ഷന് എന്നീ നിലകളിലും പ്രവര്ത്തിച്ചുവരികയാണ്.
