കണ്ണൂർ: കേരള നിയമസഭാ തിരഞ്ഞെടുപ്പിനെ മുൻനിർത്തി കണ്ണൂർ ജില്ലയിലെ വോട്ടെടുപ്പ് പ്രക്രിയ കൂടുതൽ സുതാര്യവും കുറ്റമറ്റതുമാക്കാൻ എല്ലാ പോളിംഗ് ബൂത്തുകളിലും അകത്തും പുറത്തും 100 ശതമാനം വെബ്കാസ്റ്റിംഗും ക്യാമറ നിരീക്ഷണവും ഏർപ്പെടുത്തുന്നതായി അധികൃതർ അറിയിച്ചു.
ജില്ലയിലെ 2,177 പോളിംഗ് സ്റ്റേഷനുകളിലും ക്യാമറകൾ അതിവേഗം സ്ഥാപിച്ചുകൊണ്ടിരിക്കുകയാണ്. ഓരോ ബൂത്തിന് പുറത്തുള്ള ക്യാമറകൾ വഴി വോട്ടർമാരുടെ ക്യൂയും നീക്കങ്ങളും നിരീക്ഷിക്കാൻ സാധിക്കും.
രണ്ട് തലത്തിലുള്ള നിരീക്ഷണം
ജില്ലാതലത്തിൽ കണ്ണൂർ കളക്ടറേറ്റിലെ കൺട്രോൾ റൂമിലും, ഓരോ നിയസഭാ മണ്ഡലത്തിലും റിട്ടേണിംഗ് ഓഫീസർമാരുടെ മേൽനോട്ടത്തിലുള്ള കൺട്രോൾ റൂമുകളിലും തത്സമയ നിരീക്ഷണ സംവിധാനം ഒരുക്കിയിട്ടുണ്ട്. തിരഞ്ഞെടുപ്പ് നിരീക്ഷകർ മണ്ഡലതല കേന്ദ്രങ്ങൾ സന്ദർശിക്കും. വെബ്കാസ്റ്റിംഗ് വിഭാഗത്തിലെ ജീവനക്കാർക്ക് പ്രത്യേക പരിശീലനവും നൽകിയിട്ടുണ്ട്. വോട്ടെടുപ്പിന്റെ മുഴുവൻ ദൃശ്യങ്ങളും റെക്കോർഡ് ചെയ്ത് സംസ്ഥാന മുഖ്യ തിരഞ്ഞെടുപ്പ് ഓഫീസർക്ക് കൈമാറും.
മണ്ഡലങ്ങളിലെ ഒരുക്കങ്ങൾ
പയ്യന്നൂർ മുതൽ പേരാവൂർ വരെ കണ്ണൂർ ജില്ലയിലെ 11 നിയമസഭാ മണ്ഡലങ്ങളിലെ എല്ലാ ബൂത്തുകളിലും ക്യാമറകൾ സ്ഥാപിക്കും.
കാസർകോട് ജില്ലയിലും നിരീക്ഷണം ശക്തം
കാസർകോട് ജില്ലയിലെ 119 പ്രശ്നബാധിത ബൂത്തുകളിൽ വെബ്കാസ്റ്റിംഗ് സംവിധാനം ഒരുക്കിയിട്ടുണ്ട്. 436 ബൂത്തുകൾ സംഘർഷസാധ്യതയുള്ളവയായും 97 എണ്ണം അതീവ ജാഗ്രതാ ബൂത്തുകളായും തിരിച്ചറിഞ്ഞിട്ടുണ്ട്. കൂടുതൽ സുരക്ഷ ഉറപ്പാക്കാൻ അധിക പോലീസിനെ വിന്യസിക്കും. ജില്ലയിൽ 6,584 ഉദ്യോഗസ്ഥരാണ് തെരഞ്ഞെടുപ്പ് ചുമതലയിൽ, ഇതിൽ 3,995 പേർ വനിതകളാണ്. വനിതകൾ മാത്രം പ്രവർത്തിക്കുന്ന 179 ബൂത്തുകളും ഇവിടെ സജ്ജമാക്കിയിട്ടുണ്ട്. സ്ഥാനാർഥികൾ ആവശ്യപ്പെടുന്ന അധിക ബൂത്തുകളിലും ക്യാമറ സ്ഥാപിക്കാൻ സൗകര്യമുണ്ട്, എന്നാൽ അതിന് നിശ്ചിത ഫീസ് ഈടാക്കും.
തൃശ്ശൂരിൽ കിറ്റ് വിതരണം; കേസ്
ഇതിനിടെ, തൃശ്ശൂർ വെസ്റ്റിൽ അനധികൃതമായി ഭക്ഷണക്കിറ്റുകൾ വിതരണം ചെയ്ത സംഭവത്തിൽ പോലീസ് കേസ് രജിസ്റ്റർ ചെയ്തു. ഒളരി പ്രദേശത്ത് നടത്തിയ പരിശോധനയിൽ ഏകദേശം 900 രൂപ വിലമതിക്കുന്ന 26 കിറ്റുകൾ പിടിച്ചെടുത്തു. ഇതിനുമുമ്പ് 75 കിറ്റുകൾ വിതരണം ചെയ്തതായും കണ്ടെത്തി. വോട്ടർമാരെ സ്വാധീനിക്കാൻ ശ്രമിച്ചതിന് ഭാരതീയ ന്യായ സംഹിതയും ജനപ്രാതിനിധ്യ നിയമവും പ്രകാരം കേസ് എടുത്തിട്ടുണ്ട്.
