തിരുവനന്തപുരം: ഓണക്കാലം പ്രമാണിച്ച് കെഎസ്ആർടിസി ജീവനക്കാർക്കും പെൻഷൻകാർക്കും ഉത്സവബത്തയും അഡ്വാൻസും അനുവദിക്കാൻ തീരുമാനം. ഇതിനായി 33.92 കോടി രൂപ അനുവദിച്ചതായി ഗതാഗത മന്ത്രി സി.പി. ജോൺ അറിയിച്ചു. പെൻഷൻകാർക്ക് ഓണം അലവൻസും സ്ഥിരം ജീവനക്കാർക്ക് സാലറി അഡ്വാൻസും ഉൾപ്പെടെയുള്ള ആനുകൂല്യങ്ങളാണ് ഇത്തവണ ലഭിക്കുക.

സ്ഥിരം ജീവനക്കാർക്ക് 10,000 രൂപ സാലറി അഡ്വാൻസും 3,000 രൂപ ഉത്സവബത്തയും നൽകും. അർഹരായ ജീവനക്കാർക്ക് ബോണസിനും അർഹതയുണ്ടാകും. താൽക്കാലിക ജീവനക്കാർക്ക് 1,000 രൂപയാണ് ഉത്സവബത്തയായി ലഭിക്കുക. വർഷങ്ങളുടെ ഇടവേളയ്ക്ക് ശേഷം ആദ്യമായാണ് പെൻഷൻകാർക്ക് 1,250 രൂപ ഓണം ഉത്സവബത്തയായി അനുവദിക്കുന്നത്.

സ്ഥിരം ജീവനക്കാർക്ക് ഓണം അഡ്വാൻസ് നൽകുന്നതിനായി 21.5 കോടി രൂപ മന്ത്രിസഭാ തീരുമാനപ്രകാരം കെഎസ്ആർടിസിക്ക് അനുവദിക്കും. പെൻഷൻകാർക്ക് 1,250 രൂപ വീതം ഉത്സവബത്ത നൽകുന്നതിനായി 5.32 കോടി രൂപ പ്രത്യേക ധനസഹായമായും അനുവദിച്ചിട്ടുണ്ട്.

2019ന് ശേഷം ആദ്യമായാണ് കെഎസ്ആർടിസി പെൻഷൻകാർക്ക് ഓണം അലവൻസ് ലഭിക്കുന്നത്. 2023ന് ശേഷം സ്ഥിരം ജീവനക്കാർക്ക് ഓണം സാലറി അഡ്വാൻസും നൽകിയിരുന്നില്ല. പെൻഷൻ പരിഷ്‌കരണത്തിൽ അന്തിമ തീരുമാനം ഇതുവരെ ഉണ്ടായിട്ടില്ലെങ്കിലും ഓണക്കാലത്ത് ലഭിക്കുന്ന ആനുകൂല്യം പെൻഷൻകാർക്ക് ആശ്വാസമാകുമെന്നാണ് വിലയിരുത്തൽ.

കടുത്ത സാമ്പത്തിക പ്രതിസന്ധികൾക്കിടയിലും ജീവനക്കാരുടെ ആത്മാർഥതയും അർപ്പണബോധവും പരിഗണിച്ചാണ് ഓണം ആനുകൂല്യങ്ങൾ അനുവദിക്കാൻ തീരുമാനിച്ചതെന്ന് മന്ത്രി സി.പി. ജോൺ പറഞ്ഞു. കോർപ്പറേഷൻ നേരിട്ടിരുന്ന പ്രതിസന്ധികൾ പരിഹരിച്ച് മുന്നോട്ടുപോകുന്നതിനിടെയാണ് ജീവനക്കാരുടെയും പെൻഷൻകാരുടെയും ഓണം സന്തോഷകരമാക്കാനുള്ള തീരുമാനം.

മുൻ വർഷങ്ങളിൽ സാമ്പത്തിക പ്രതിസന്ധിയുടെ പശ്ചാത്തലത്തിൽ ഓണം ആനുകൂല്യങ്ങൾ ലഭിക്കാതിരുന്ന ജീവനക്കാർക്കും പെൻഷൻകാർക്കും ഇത്തവണത്തെ തീരുമാനം ആശ്വാസമാകും.