പാലക്കാട്: ഒറ്റപ്പാലം കണ്ണിയംപുറം തോട്ടിൽ മധ്യവയസ്കന്റെ മൃതദേഹം കണ്ടെത്തി. കുഴിക്കാട്ടിൽ പറമ്പിൽ സതീഷ് കുമാർ (51) ആണ് മരിച്ചത്. ഇന്നലെ രാത്രിയിലാണ് മൃതദേഹം തോട്ടിൽ കണ്ടെത്തിയത്.

മീൻപിടിക്കാൻ സ്ഥാപിച്ച വൈദ്യുതിക്കെണിയിൽ നിന്ന് ഷോക്കേറ്റാണ് മരണമെന്നാണ് പൊലീസിന്റെ പ്രാഥമിക നിഗമനം. കെണി ഒരുക്കാൻ ഉപയോഗിച്ചതെന്ന് സംശയിക്കുന്ന ഇലക്ട്രിക് വയറുകളും സംഭവസ്ഥലത്തുനിന്ന് കണ്ടെത്തി.

സമീപത്തെ വൈദ്യുതി പോസ്റ്റിൽ ഘടിപ്പിച്ച നിലയിലുണ്ടായിരുന്ന വയറുകളും പൊലീസ് കണ്ടെടുത്തു. മീൻ പിടിക്കുന്നതിനിടയിൽ സതീഷ് കുമാറിന് ഷോക്കേറ്റതാകാമെന്നാണ് കരുതുന്നത്. പോസ്റ്റ്മോർട്ടം നടപടികൾ പൂർത്തിയായ ശേഷമേ മരണകാരണം സംബന്ധിച്ച് ഔദ്യോഗിക സ്ഥിരീകരണം ഉണ്ടാകൂ. സംഭവത്തിൽ പൊലീസ് അന്വേഷണം തുടരുകയാണ്.