കാസര്കോട്: കുമ്പള ഗവ. ഹയര്സെക്കന്ഡറി സ്കൂളില് കലോത്സവത്തിനിടെ കുട്ടികള് അവതരിപ്പിച്ച പലസ്തീന് ഐക്യദാര്ഢ്യ മൈം ഷോ വീണ്ടും അവതരിപ്പിക്കും. അധ്യാപകന് കര്ട്ടന് ഇട്ടതിനെ തുടര്ന്ന് മുടങ്ങിയ മൈം നാളെ വീണ്ടും അവതരിപ്പിക്കാനാണ് തീരുമാനം. ഉച്ചക്ക് 12 നാണ് മൈം അവതരിപ്പിക്കുക. ആരോപണ വിധേയരായ രണ്ട് അധ്യാപകരേയും മാറ്റി നിര്ത്തിയായിരിക്കും അവതരണം. അതേസമയം, നിര്ത്തിവച്ച കലോത്സവം രാവിലെ മുതല് തുടങ്ങാനും തീരുമാനമായിട്ടുണ്ട്. സംഭവത്തില് അന്വേഷണം പ്രഖ്യാപിച്ചിട്ടുണ്ടെന്നും അടിയന്തരമായി അന്വേഷണ റിപ്പോര്ട്ട് നല്കാന് ആവശ്യപ്പെട്ടിട്ടുണ്ടെന്നും മന്ത്രി വി ശിവന് കുട്ടി പറഞ്ഞിരുന്നു.
അന്വേഷണ റിപ്പോര്ട്ട് ലഭിച്ചാല് തുടര് നടപടി ഉണ്ടാകും. പലസ്തീന് ഐക്യദാര്ഢ്യം പ്രഖ്യാപിച്ചു ഏതെങ്കിലും ഒരു കലാരൂപം അവതരിപ്പിച്ചാല് അത് തടയുന്നതും അതിന്റെ പേരില് യുവജനോത്സവം നിര്ത്തിവയ്ക്കുന്നതും മര്യാദകേടാണ്. സംഭവത്തില് കര്ശനമായ നടപടി സ്വീകരിക്കുമെന്നും മന്ത്രി വി ശിവന്കുട്ടി വ്യക്തമാക്കി.
.
